是咁的，從前有個香港人，去咗台灣賣雞蛋仔，有一日，佢返返嚟香港喺元朗開分店。呢個故事，未講完。呢間雞蛋仔店，喺台灣超紅，可能你哋都食過，有心心煙花棒嗰間呀！雖然返到嚟香港冇咗支心心棒，但啲雪糕雞蛋仔一樣咁靚靚仔仔，而且仲有啲香港先有嘅限定款式！
「繽紛派對」就係佢哋嘅鎮店之寶啦，雞蛋仔包住嘅雪糕可以揀牛奶味或者伯爵奶茶味，兩款味道都係自家製嘅。上面再擺埋新鮮士多啤梨同芝士蛋糕粒，最後插多支焦糖味嘅棉花糖，淨係造型都已經攞滿分。的確係會好想畀相機食先嘅，但記得提部機食快少少呀，棉花糖同雪糕都快溶㗎。
至於變奏版嘅「黑珠誘惑」就係香港限定款式嚟。同樣可以揀雪糕嘅口味，牛奶味又香又滑，奶茶味嘅茶味就偏淡咗少少。然後淋上新鮮自家煮，幾有咬口嘅黑糖珍珠同糖漿，至於主角雞蛋仔，預設係綠茶口味嚟，用日本麵粉、日本綠茶同綠茶粉製作，色水夠綠之餘，綠茶味道亦相當濃郁，同珍珠幾夾呀，仲真係做到外脆內軟，綿密度剛好，唔會話太空心又唔會實到好似蛋糕咁。係要小心啲，食食下啲珍珠可能會跌落嚟咯科科。
唔加雪糕，就咁要一底雞蛋仔當然冇問題啦，仲有好多款口味揀添。例如紅絲絨朱古力、伯爵紅茶、芝士四重奏等等。要數最受歡迎嘅一定係朱古力心太軟！睇住店員淋完朱古力蛋漿之後，仲逐格逐格放入意大利朱古力粒！未整起已經聞到好香朱古力甜味，好有治癒感！食落口感濕軟，味道極濃，朱古力控絕對要試。
有得雞蛋仔，點少得埋窩夫？呢度個「花心窩夫」都係香港限定，幾有特色，平時食啲格仔餅，咪對摺夾埋中間搽下花生醬呀灑下糖咁嘅，呢度係將啲花生醬，噢，正確嚟講應該係厚厚der花生醬完美融入埋落個窩夫度，好勻洵，啖啖都有花生醬香味 =)
用藍橙、菠蘿汁等溝出嚟嘅「泡泡之藍」，酸中帶甜，幾fresh幾解暑。
The Waffle Club
地址：元朗西菁街2號興旺樓地下1C號舖
文、相：Kar