喺疫情打擊下，多間餐廳生意水靜鵝飛，但上環一間餐廳依然繼續免費派發平安飯盒畀長者同有需要人士！
圖：銀杏館Facebook
根據銀杏館嘅Facebook帖文表示，上環耆素銀杏館前幾晚本嚟都打算關店休息，但見到門外有多名長者排隊，輪候平安飯盒，於是又恢復返晚間飯盒派發行動。有位80歲嘅露宿者攞完飯後同舖頭講：「好彩你哋開返門，你可能唔知呢個飯盒係好重要...多謝！」另一晚，喺油麻地嘅分店派飯時，亦有位熱心巿民許太送上多個口罩畀輪候嘅弱勢社群。
圖：銀杏館Facebook
錦上添花易，雪中送炭難。今個星期日（3月1日）中午，餐廳將會繼續免費派發素餐飯盒、加多碗防疫素湯水、生果同埋禮物畀貧弱/獨居長者、露宿者、殘疾人士等有需要嘅人。
耆素銀杏館
地址：上環干諾道西3號億利商業大廈地下A及B舖