呢排上網，睇親好多嘅都係邊間邊間餐廳停業，甚至要結業嘅消息。不過，都有啲好消息嘅！最近多咗一啲有多年歷史嘅老店，或者係人氣小店結業後宣佈重開喇！包括彈牙魚肉魚蛋、懷舊冰廳、芫荽拉麵店等，大家又可以食返一度消失咗嘅味道喇。
老餅家 均香餅家
圖：喺深水埗開業逾40年嘅老餅店，以雞仔餅同老婆餅聞名，儲落唔少熟客，但舊年8月因為不敵加租而無奈結業。幸好佢哋今年年頭宣佈，成功租到舊址鄰舖，近日喺北河街重開！保留前舖後工場嘅格局，雖然暫時未有新產品面世，不過因為迎接端午，小店亦有各款鹹甜口味嘅粽賣啊。
魚肉白魚蛋 林昌記
圖：本身位於深水埗嘅林昌記，2014年開業時曾創下3日賣十萬粒魚蛋紀錄，佢哋嘅魚蛋標榜以新鮮魚肉打成，每粒98%以上都係魚肉，飽滿彈牙帶魚香。2020年全線結業後轉為團購業務，2022年終於有好消息喇，佢哋喺年初四開返門巿喇。轉戰觀塘，新店只得外賣冇堂食，除咗招牌白魚蛋以外，更有以海魚、墨魚、八爪魚等製作嘅海鮮炸角，甚至連炒麵、粥品都有供應。
懷舊冰廳 大安茶冰廳
圖：餐廳IG
1969年開業嘅大安茶冰廳，裝修懷舊，係唔少油麻地街坊嘅飯堂，亦係一代人嘅集體回憶。餐廳喺上年10月尾業後，得到有心人承傳、保留。經裝修後最近喺原址重開，新嘅負責人刻意保留舊日卡座風格，而Menu則加入咗唔少時下café嘅潮物，例如有單品咖啡、matcha latte、甚至係創新嘅啡立刻(holick coffee)等，並有多款輕食甜品，杏霜蛋卷、焦糖蛋撻、檸茶曲奇等。
半世紀餅店 新香冰廳餅店
圖：1970年開業嘅老餅店，有逾52年歷史，曾一度轉手予上任老闆。點知佢哋早前貼出告示，表示只係營業到2月28號。幸好，最近有新老闆接手，並保留舊員工以及部分原有裝修，並再度重新開業。食物方面亦冇重大變動，都係以西餅、麵包同蛋撻為主。
特色拉麵小店 Maki拉麵
早前曾創作出芫荽拉麵同埋藍色蝶豆花拉麵，吸引咗好多人慕名前往嘅拉麵小店，上年年中先開業，但今年年頭就因為業主加租而被迫結業。店主加主廚係入行逾15年嘅女師傅，曾喺日本學師。幸好，佢哋前兩日（3月22日）終於搵到新舖位，可以喺原址嘅隔籬舖位重新開業。新店menu同舊店一樣，主打九州風格豚骨湯，同埋雞骨湯拉麵，另外芫荽同蝶豆花拉麵都繼續有得食，機會又返返嚟喇飛雲。
人氣歐陸風Cafe Passepartout
圖：本身喺銅鑼灣開舖嘅人氣café，上年年底結業後，今年2月13號搬咗去佐敦重開。繼續有靚靚歐陸風裝修，並有半戶外露天座位，的確係製造到啲旅行feel嘅。主打多款fusion菜式，配搭特別，並有新出嘅威靈頓春卷，同埋必食嘅焦糖Flan Cake等，粉絲又可以再去朝聖打卡喇。
文：Kar