來自北京嘅東來順始創於1903年，以涮羊肉聞名，餐廳亦有供應少鹽少糖中菜，由總廚施超群師傅主理。
甜豆百合炒桂魚絲
選用兩斤重桂魚，切成絲後連同甜豆及百合翻炒，比以往少落一半鹽同糖，主要靠甜豆同百合兩者嘅清甜令桂魚肉味道更鮮味，而且口感會更豐富。
花雕蛋白蒸蟹鉗
呢味菜主要食返食材原味，完全無添加任何鹽及糖。挑選一級肉蟹，蟹鉗啖啖肉，再用農場雞蛋嘅蛋白烹調。以少量陳年花雕、雞湯等提味，令食客品嚐到蟹肉原有嘅鮮味。
鮮淮山烏筍炒雞片
鮮淮山又稱山藥，帶有甜味，更有保護胃部黏膜及幫助體內消化等功效。鮮淮山同爽口嘅烏筍與事先處理好嘅雞胸片爆炒，再落少量鹽，食材鮮味盡顯。
東來順
地址：尖沙咀麼地道69號帝苑酒店B2層電話：2733 2020
國金軒由中菜部行政總廚Edwin Tang主理，每款菜式都選用不同食材取代鹽及糖，係誠意之作。
爵士花膠蜜瓜燉螺頭湯
有無聽過用蜜瓜嚟燉湯呢？師傅巧妙使用日本夕張蜜瓜嘅果糖取代普通糖，並使用瑤柱嘅鹹鮮味及螺頭嘅海水味來取代鹽，加入豬肉及雞腳燉成。飲落味道濃郁清甜，係健康燉湯好選擇。
淮陽玉液浸東星斑球
食材包括東星斑、白蘿蔔、白胡椒及大頭菜，利用白胡椒帶出白蘿蔔嘅甜味，及已浸泡嘅大頭菜本身嘅鹹味取代調味品，所以都完全唔需要落鹽。
桂花鮮蟹肉炒瑤柱
使用新鮮嘅花蟹肉甜味取代糖，並使用瑤柱鹹鮮味及西班牙風乾火腿嘅鹹香味來取代鹽，加埋蛋一齊翻炒味道更香之餘仲好豐富。
國金軒
全線分店：https://www.openrice.com/zh/hongkong/restaurants?chainId=10001316
十里洋場主打淮揚菜，菜式亦以細緻刀工聞名，由陳曉鶴師傅主理。
清炒江蘇野生河蝦仁
餐廳三道少鹽少糖菜式都配上醋，可以去除腥味及土味。清炒蝦仁選用江蘇野生河蝦，粒粒都彈牙飽滿。只需加少少食鹽就可突顯蝦仁鮮味。
龍鬚桂魚
呢味龍鬚桂魚夠晒考刀功啦！據講係為皇帝下江南而設，因為以前滿族人唔識食魚，所以就將魚肉切成一絲絲啦。桂魚滑溜，比平日減少約三成鹽。
瑤柱賽螃蟹
食材簡單只有雞蛋及元貝，選購優質農場雞產下嘅蛋，具豐富蛋白質，而且蛋味香濃。加入宗谷大元貝提鮮，少鹽少糖更食得到大元貝原味。
十里洋場
地址： 銅鑼灣恩平道28號利園二期101號舖電話：2338 5500
* 資料由客戶提供