十個香港人有八個都係海鮮控，銅鑼灣以即席浜燒新鮮海產為主打嘅餐廳，喺尖沙咀開咗分店，仲有幾款尖咀店限定嘅河豚料理新菜式添~ 要知道，香港好少地方食到河豚㗎。

餐廳提供嘅河豚主要係嚟自長崎縣，肉質鮮甜少脂肪，而且經專業師傅處理過。河豚鍋湯底由河豚魚頭骨加昆布、鰹魚煮成，口味雖淡，但淥河豚片時就可以突出到肉片嘅鮮甜。

酸汁魚皮保持得到原有嘅彈性，口感爽脆有嚼勁，但本身冇乜味，要點埋酸汁先至醍胃。

白子唐揚外脆內滑，加埋微辣嘅蒜蓉沙律醬，又一開胃小食。

想要香口啲嘅就可叫燒河豚一夜干，燒完層皮韌韌地有咬口，肉質紮實，好啱送酒啊。

講到酒，點可以少得火燄酒蒸雜貝。貴妃蚌、北寄貝、馬刀貝、象拔仔等時令貝類，放入加咗昆布嘅酒鍋即時蒸煮，仲大爆火光好有睇頭。酒精揮發晒而酒香同貝類嘅鮮甜就全部留低，成個湯底香到不得了，酒鬼實鍾意，記得食貝之餘，要大啖大啖咁飲埋啲湯呀！

呢煲原隻螃蟹釜飯都好吸引，一打開蓋，就見到原隻蟹喺飯面！撈勻意大利翠玉瓜、蟹肉、蟹膏等多款配料一齊食，米香中都滲有鮮甜味道。

蟹迷唔可以錯過嘅仲有味噌蟹甲羅燒。望住店員燒盛滿蟹肉同蟹膏、倒埋鵪鶉蛋落去嘅甲羅燒，陣陣香味傳入鼻中，未食已經流晒口水。而重點係，新店開張仲有優惠，每位畀$98就可以任食喇！！全盛時期到底可以食到幾多隻？（留意返優惠去到5月31號，逢星期日至四，仲要全枱一齊用先得）

 燒A5和牛扒

 浜燒白鱔

漁獲浜燒
地址：尖沙咀厚福街8號H8 11樓

文、相、片：Kar