近兩年將軍澳海旁有唔少餐廳進駐，最新就有呢間主打悠閒摩登風格嘅港式冰室，糅合經典同創新元素，好似四色腸粉、抹茶紅豆冰等。必試佢哋嘅伊麵，本地製作口感彈牙；另一推介係爆餡厚多士，名副其實非常足料。另外仲有Coffee Stand，各位帶毛孩去將軍澳南海濱長廊散步嘅主人可以嚟買外賣！
 

皓民冰室位於將軍澳翩匯坊地下，係西九HOOMAN by the Sea同天后SUPERHOOMAN嘅姐妹店，今次就以香港人最熟悉嘅冰室為概念。裝修以暖色為主，加上植物點綴，仲有大玻璃窗，感覺休閒輕鬆。新店更特設店長推介兒童餐，方便大家一家大細嚟開餐。
 

百變四色腸粉（早餐時段$38包咖啡/茶，全日$48配魚肉燒賣包咖啡/茶）

港式街頭小食腸粉、燒賣等，喺呢間冰室都有得食。最特別就要數到呢份百變四色腸粉，四色係指四款唔同口味嘅自家調配醬汁：先辣後甜嘅芥末蛋黃醬、食到粒粒鹹蛋黃香味嘅鹹蛋黃醬、鹹中帶甜嘅海鮮醬，同香辣惹味嘅辣茄醬。白布腸粉雪白爽滑，唔點醬汁都有淡淡米香。
 

爆餡厚多士（$68包咖啡/茶）

名副其實夠爆餡！烘至外脆內軟厚切多士夾住粗粒花生醬、3.6牛乳炒滑蛋、秘製牛肉同叉燒，食落先品嘗到花生醬嘅甜香，再咬就係牛肉同叉燒粒嘅肉味，同時牛乳滑蛋會中和返花生醬嘅甜度，口感同味道層次都非常豐富，食落滿足之餘又唔會太膩。
 

半熟蛋柱侯牛腩伊麵（$88，午餐時段可以半價加配飲品）

冰室招牌菜之一就係佢哋皓民伊麵系列，自家秘方加上係本地製作，選用新鮮雞蛋同精純菜籽油而且以傳統古法打麵，麵條比一般伊麵粗身，掛汁效果唔錯而且相當彈牙爽口。呢碟就配搭師傅以秘製柱侯醬炆燉48小時嘅牛腩同半熟蛋，牛腩肉質鬆軟帶筋、入味富鹹香。
 

 

紅豆宇治抹茶鮮奶（$40）

飲品選擇同樣多元化，咖啡選用本地烘焙嘅Studio Caffeine Roastery咖啡豆，亦有黑牛、白牛（各$38）等嘅經典飲品。而呢杯就好似抹茶版嘅紅豆冰，煮至綿綿鬆鬆嘅粒粒紅豆配搭抹茶牛奶，紅豆嘅微甜襯托出抹茶淡淡甘香。
 

藍色多瑙河（$48）

餐廳一角係Coffee stand，可以畀大家買飲品同雪糕外賣，包括呢杯喺西九文化區HOOMAN by the Sea大受歡迎嘅藍色多瑙河，即係Blue Lemonade，帶氣泡口感，加上檸檬嘅自然酸味感覺好消暑。
 

皓民冰室 
地址：將軍澳唐俊街21號翩匯坊地下17號舖

文、相：Cathy