情人節轉眼又到喇！想為身邊嘅人準備一份甜蜜蜜嘅驚喜？今年開飯仔搜羅咗5間精品/手工朱古力品牌畀大家，包括有本地製造手工朱古力、得獎朱古力及日本人氣生巧克力品牌，絕對可以令伴侶們感受到愛意。

目錄

香港製造+香港設計 Choco next

100%香港製造嘅朱古力品牌，堅持香港製造．香港設計，精選歐洲原材料運送至香港後，由香港朱古力師手工製成。今個情人節推出永生花朱古力禮盒，有六款唔同顏色嘅永生花選擇，禮盒中除咗永生花更附有野生藍鈴花香味蠟燭一罐及特色朱古力禮盒一盒，象徵住永恆不變嘅愛情，好有意思～傳意 • 朱古力禮盒都好值得買，呢盒朱古力會幫你將講唔出口嘅說話傳遞畀心上人，包括士多啤梨酥餅、開心果等口味，啱晒啲內斂嘅朋友。

圖: 品牌官方網站

全球五大最佳朱古力 Hakawa Chocolate

由兩個小女生開設嘅本地精品朱古力小店，佢哋堅持以原豆製朱古力，由挑選可可豆到烘焗都親力親為，之前仲被加拿大環球郵報評為全球五大最佳朱古力！招牌包括黑朱古力及杏仁朱古力，有唔同濃度，可可豆會根據邊度當造而選擇，黑朱古力入口順滑，杏仁朱古力就更香同多咗份口感，78%濃度係最多人推介～

圖: BonnieLeung1084

加納可可生朱古力 ROYCE’

來自日本嘅超人氣朱古力品牌，相信大家都唔陌生。今年情人節推出加納可可生朱古力，呢款朱古力就充分展現加納可可嘅酸味、苦味同濃郁嘅味道。香濃可可同鮮忌廉完美融合，配合埋絲帶設計包裝，女仔收到一定鍾意。

圖: 品牌官方Instagram

得獎原豆朱古力 Gamma Craft Chocolate

由90後烘焙師Whitney開設，到過瑞士進修烘培課程，回流後曾經代表香港於世界朱古力大賽獲得共16個獎項！佢嘅朱古力高質素同好有創意，加入唔少本地食材如日曬海鹽及花雕酒等。秘魯黑朱古力同墨西哥黑朱古力都係店主推介～

圖: 品牌官方網站

紐約名品朱古力品牌 MarieBelle

著名嘅紐約朱古力品牌早兩年低調喺香港開網店，因為創辦人係時裝設計師嘅關係，每一款朱古力嘅賣相都好精緻。唔單止靚連味道都係頂級，皆因佢哋採用被稱為夢幻可可豆嘅Criollo，主要產自中、南美洲，佔可可豆總產量不足10%，色澤啡中帶紅調，並帶焦糖、果仁、呍呢拿、煙草等芳香，味道好獨特。情人節品牌推出咗超多collection，由百零蚊到千幾蚊都有，豐儉由人。

圖: 品牌官方網站

文: Yanica