日本人氣甜品品牌副線，喺當地走輕食cafe模式，嚟到香港則主打店內現烤麵包，更推出多款香港限定新品～其中北海道牛乳軟包、北海道牛乳酥撻同埋迷你日式蜜瓜吐司包，都加入品牌指定北海道農場空運直送嘅牛乳，確保保持品牌特色！

香港限定

北海道牛乳軟包（$38/個）

北海道牛乳軟包係以Maritozzo為藍本嘅冷食麵包甜品，鬆軟嘅麵包內加入大量自家製北海道生忌廉，現時設有朱古力同開心果味，後者更用上日本開心果醬製作，入口輕盈，有奶香之餘幾清新。

北海道牛乳酥撻（$14/個）

近年人氣嘅酥撻都可以喺度揾到！酸種酥撻夠薄身，每層酥皮都好鬆化；而蛋漿注入新鮮空運到港嘅北海道農場牛乳，蛋香同奶香平衡得啱啱好，蛋芯亦夠滑嫩。

迷你日式蜜瓜吐司包（$28/個）

日式包點之中，蜜瓜包絕對係當地人氣款式，但香港分店就搞搞新意思，將蜜瓜包變成吐司造型，而「蜜瓜皮」更包裹四邊同麵糰融為一體，令整個包嘅外圍都有脆脆嘅口感。吐司內裡則注入以北海道牛乳、吉士同日本雲呢拿籽調配而成嘅餡料，清新香甜唔會腬。

黑松露芝士溶岩麵包（$40/個）

塗上滿滿嘅黑松露醬

黑松露芝士溶岩麵包外形似吐司，但其實係「卷物」～師傅搓開麵糰成長條形後，塗上黑松露醬、舖滿紐西蘭芝士粒就捲起放入模具烤焗，口感相對鬆軟，松露香氣突出而冇「電油」味，意外地鹹香得嚟唔覺得重口味。

日本醬油酸種法包（$28/條）差不多等於3個麵包長度

如果你鍾意食法包，呢款日本醬油味值得一試！以品牌獨有配方製作，酸種麵糰加入日本百年醬油，同麥香好夾，微鹹嘅醬油香氣令法包更有層次，內裡仲好鬆軟，係幾有驚喜嘅款式。

微笑牛角酥（$22/個）

由麵糰到焗起都係脹卜卜

店定表示正宗法式牛角造型其實係呢個微笑款，但製作比較考功夫，拉麵糰彎位時要掌握得好，焗起先可以保持形狀，仲有脆卜卜口感。

法式口味

朱古力牛角酥、開心果雙色牛角酥（$26/個）

鬆軟有空氣感

牛角酥仲有唔同口味同形狀，其中朱古力同開心果味都唔會太甜，不過開心果味做成流心效果，口感相對濕潤啲。

丹麥酥（$30/個）

愛好鮮果嘅朋友，法式丹麥酥就啱你喇，藍莓同草莓味都舖滿果肉，配上原味吉士醬、開心果碎，當甜品食都得。

日式鹹包

日式洋蔥火腿包（$22/個）、日式咖喱牛肉包（$24/個）

日本月島芝士法包（$18/個）

鹹包都有多款選擇，例如日式洋蔥火腿包用日本洋蔥製作，唔會有辛辣味，反而增加一點清甜味道；日式咖喱牛肉包就係經典款式，肉粒大細適中，咖喱帶微微辛香，並唔係濃厚風味；仲有日本月島芝士法包有半融芝士粒，留意麵包相對硬啲。

MERCI MONCHER
地址: 銅鑼灣蘭芳道15號地舖

文、相：Cathy
片：Cathy、Tony