早前我哋喺「過江龍登陸！海港城3大新店預告」文中，率先發放八天堂來港開店嘅消息，而家舖頭現正試業啦，究竟舖頭有咩咁吸引？有乜好東西食先？即睇八天堂5款必食items！

1933年，八天堂喺日本廣島開業，至今已超過80年歷史。喺日本而家已經開咗20間分店，另外喺台灣、新加坡、南韓、菲律賓等地亦設海外分店。

店舖主打嘅忌廉麵包，每日由八天堂位於日本廣島嘅中央工場直送至各間分店，唯獨試業中嘅香港店及新加坡店先有自家工場，每日人手手造忌廉麵包架！

舖頭而家每日會整1,000個包，大約早上11點以及下午2點出爐。首先將麵糰按重量搓成小麵糰，並放入焗爐，就變成一個個脹卜卜嘅麵包啦！

麵包放涼後唧入不同口味嘅忌廉。包裝好就大功告成啦！

點樣將新鮮忌廉麵包保存好，再運送至各地？八天堂利用「雪融」技術，令保存忌廉嘅時間變長。忌廉麵包可存放於室溫大約1小時，如果暫時未食嘅話可放入雪櫃，雪一晚之後再食，麵包更為鬆化架！

忌廉麵包有原味、生奶油、朱古力、抹茶以及紅豆，一共5款口味。

左邊係原味，即吉士味，係日本店最受客人歡迎嘅忌廉麵包；右邊係生奶油味，個賣相睇落差不多，但其實原味偏向蛋味重啲，生奶油嘅話，忌廉味會更濃郁！

香港嘅朱古力味忌廉麵包會同日本店嘅稍有不同，因為香港店會用比利時朱古力，可可味較重，而日本店就用奶味重啲嘅朱古力；至於抹茶，香港同日本店一樣，都係用宇治園抹茶製成嘅！

問店員試業幾日，暫時邊款比較好賣？店員暫時仲係好難捉摸，一時生奶油，一時抹茶，而尋日嘅人氣王就係紅豆味喇！嚟緊八天堂仲同日本山田養蜂場合作，喺10月頭正式開業時推出限定蜂蜜口味嘅忌廉麵包添！

其他食物：

南蠻炸雞漢堡配黑松露炸薯條($118)，香港店限定，用甜甜酸酸嘅南蠻汁將雞件調味，再加埋自家製他他醬、番茄、生菜及辣椒絲造成漢堡。炸雞外皮不太脆，不過好厚身，亦好juicy。

左邊嘅八天堂西多士($78)，係將鮮奶油忌廉麵包香煎而成，再喺外面加多層焦糖，冷熱交融。旁邊仲有焦糖香蕉、忌廉及鮮果等；右邊係明太子烏冬配溫泉蛋($128)，蛋漿流心嘅一刻已經好治癒，連同明太子烏冬，好惹味，仲跟送一個小小嘅凱撒沙律及麵豉湯添！

(左)八天堂出品嘅波子汽水($48)；(右)店內供應嘅咖啡都係出產自伊都岐咖啡，用巴西、危地馬拉及印尼混成嘅咖啡豆，味道偏酸，價錢由$46起。

店子亦供應軟雪糕，分牛奶、咖啡兩款，牛奶雪糕係用咗8.0牛奶，而咖啡味係用伊都岐咖啡粉blend開而成，所以咖啡味好濃。

Cafe內只有60幾個座位，不算多，但望到街景嘅落地玻璃，加埋柔和燈光，感覺幾cozy。

八天堂
地址：尖沙咀廣東道25號海港城港威商場地下G104號舖

文：Joy