燒雞翼人人都鍾意食，想食炭燒風味唯有BBQ，或者去幫襯呢間串燒店！弄燒位於深水埗，小店格局，一入到去就見到左右門神積勤同安格斯，就知呢度主打雞同牛啦！
店主Sean稱，因為自己鍾意食串燒而開店，見到深水埗食肆轉變得好快，所以決定落戶呢區。而家有唔少街坊熟客來幫襯，好有人情味！
餐牌似足舊式日曆，設計過癮。串燒類分為鳥燒、肉燒、海鮮燒、蔬菜燒，有超過30款，選擇都幾豐富。有別於一般只係鹽燒同汁燒，每款都已經配上自家調製醬汁，好似雞翼配自家香料或明太子、清酒鹽燒雞軟骨、雞胸肉配花椒醬油等，大約有8至10種帶港式及東南亞風調味。好似有油雞切雞常見嘅薑葱，少少麻辣嘅花椒油、以孜然、川辣椒、茴香籽調成自家香料等。
食材不經醃製，一邊燒一邊調味。雞肉用三黃雞，肥瘦適中，更加用日本備長炭炭燒，備長炭唔會有炭灰，燒出嚟陣陣炭香味，外表微微焦脆，香口惹味。大部分串燒會蘸入以雞殼、燒料等調成醬油，微甜又唔會太鹹，食得出食材原味。
自家香料雞翼 $28、花椒醬油雞胸肉 $18、日本紫蘇雞腿肉 $24、薑葱醬油雞腎 $18、清酒鹽燒雞軟骨 $18
肉類海鮮都選用靚貨，有安格斯、鹿兒島和牛、北海道帶及及新鮮白鱔等。必吃推介有大王虎蝦，配上鹹蛋黃醬，非常足料，食落好甘香！師傳控制火候剛剛好，串燒食落仍然juicy唔乾身。
薑葱醬油厚切牛舌 $38、牛油燒安格斯牛肉 $58、照燒汁紫菜年糕 $28、花椒醬油豬頸肉 $18、柚子醬油五花腩 $18
黃金燒大王虎蝦 $68、照燒汁鮮燒白鱔 $68、海鹽檸檬北海道帶子 $48、醬油檸檬多春魚 $18
甜品就一定要試燒菠蘿，外層有薄薄焦糖效果，加埋辣椒粉，甜甜辣辣又解膩，會食上癮！如果仲未夠飽，亦有丼同烏冬，腐乳及薑葱鹹蛋黃飯糰，或者吞拿魚茶漬飯，滿足喇啩？
煙燻汁蕃茄沙律 $38、辣椒糖燒鮮鳳梨 $18
地址：深水埗福華街178號地舖
文、相、片：Perrins