早餐KOL張敬軒（軒仔）今次唔食早餐，轉戰下午茶？原來譚仔雲南米線（譚仔）同譚仔三哥米線（三哥）同時首度推出「Me More下午茶餐」呀，除咗有新品輕食外，更可以任意配搭，超多組合選擇，難怪今年重投唱作人行列嘅軒仔，都即場大改歌詞「想得到譚仔 我又要三哥」啦！
Me More下午茶餐今日起，每日下午2:30至5:30都有供應，眾多選擇中不乏新貴，包括炸醬飯、玉桂焦糖多士、烘土匪炸醬芝士三文治、清湯小食同十三香辣小食三寶。而自選雙餸/三餸米線同過橋米線更有迷你版。
炸醬飯
炸醬絕對係萬能Key，軒仔表示自己平時會發揮創意，自創唔同食法，例如將炸醬同腩肉創作出另類open toast，又或者炸醬釀豆卜咁。而今次嘅下午茶，炸醬除咗跟米線之外，仲可以跟埋飯同三文治。全新嘅炸醬飯，係譚仔同三哥首次推出嘅飯品，鹹鹹地嘅炸醬搭埋酸菜，好送得飯。如果你嘅配搭選擇係炸醬飯加迷你米線嘅話，建議可試下將飯加埋入湯，變成湯飯。
烘土匪炸醬芝士三文治 (左) 、肉桂焦糖多士 (右)
至於烘土匪炸醬芝士三文治，係軒仔同款三文治呀！軒仔話：「烘土匪炸醬芝士三文治係我去譚仔食早餐嘅必點之一，而家下午茶時間無論去到譚仔定三哥都食到！」喺麵包上搽上牛油，再灑埋土匪雞翼嘅香料，中間夾餡係半融芝士同炸醬，估唔到又幾夾，不過食落嘅土匪香料味就唔算突出。
迷你版過小橋米線係下午茶限定架咋，即係過橋米線輕量版，配有豬肉、牛肉、雞肉、墨丸等9款指定配料，份量啱啱好。
清湯小食 (左) 、十三香辣小食三寶 (右)
小食方面，除咗食開嘅雞翼呀蒜泥白肉呀麻辣豬耳呀等等變晒一人份之外，新增嘅兩款清湯小食同十三香辣小食三寶均可自選食材，組合包括魚蛋、魚腐、魚片頭、豬皮等。溫提一下，十三香辣小食三寶冇得揀辣度，就咁望成碗紅油都睇得出，有返咁上下辣勁啊。
望住成個餐牌配搭選擇多到，仲可以加配再加配，選擇困難症嘅朋友仔今次頭痕了。唔怕，學軒仔話齋：「今次試唔晒，下次再嚟嗌！」
譚仔雲南米線全線分店地址：（按此）
譚仔三哥米線全線分店地址：（按此）
文：Kar
相：Cathy
片：Kar、Cathy
