下星期就係復活節啦，呢個充滿希望同生命力嘅節日，當然要來點甜咯。多間糕餅店同餐廳等，都趁住呢個歡愉嘅節日，推出多款造型可愛嘅蛋糕、朱古力同甜品等，畀大家一齊開心過節。

有個優惠益大家：OpenRice Pay【復活節快閃$28疊疊賞】！由即日至4月18日，於內文提及嘅餐廳中*，分別累積消費金額最高嘅首5名顧客，可享$28 開飯賞！

兔兔配牛油果蛋糕   Soffee    

以意式Fusion菜作主打嘅餐廳，有款七彩漸層嘅夢幻青提綠茶，杯上更印有兔仔圖案，好有復活節輕鬆愉快嘅氣氛。另外，佢哋亦推出兔兔配牛油果蛋糕慶節，蛋糕以新鮮澳洲牛油果製作，由牛油果慕絲、牛油果蓉同戚風蛋糕組成，香氣十足，牛油果迷唔可以錯過。

復活小兔蛋糕  Nina Patisserie     

酒店級數嘅糕品店，供應嘅蛋糕同甜點一向以精緻見稱。今次特別為復活節創作嘅復活小兔蛋糕，係立體小兔造型，好可愛。呢個芒果朱古力慕絲蛋糕，餅底係榛子朱古力蛋白甜餅，內層有雲呢嗱同黑朱古力慕絲、芒果忌廉，加埋芒果啫喱，帶嚟一絲清新感覺。另一款以煎蛋為造型嘅朱古力撻，亦同為芒果朱古力慕絲口味，口感豐富。喺中環分店選購嘅話更可賺取「亞洲萬里通」里數。復活節唔少得復活蛋，佢哋同時推出咗朱古力復活蛋同迷你朱古力復活蛋，都係以法國品牌Valrhona朱古力製作， 醇美甜香，其中大大粒嘅立體復活蛋內，更有5粒迷你版呢，夠晒驚喜。

美祿髒髒龍   Twinkle Baker Décor    

全港約有16間分店嘅蛋糕店，蛋糕造型往往出奇破格，係打卡首選。今次復活節系列都唔例外，兩款蛋糕分別係MILO®髒髒龍同烏卒卒。前者係美祿慕絲同朱古力牛油蛋糕，配美祿可可球加朱古力脆莎榛子醬；後者則係朱古力牛油蛋糕內，鋪上Oreo餅乾碎加抹茶曲奇碎，中間仲有兩層厚厚嘅Oreo餅乾碎同72%黑朱古力慕絲。兩款嘅甜味各有千秋，仲可賺取「亞洲萬里通」里數呢。

開心果朱古力蛋   Venchi

嚟自意大利嘅百年朱古力品牌，一直堅持採用純天然材料製作。今年嘅復活節為大家帶嚟多款口味嘅朱古力蛋，傳統鐵罐Chocoviar除咗有牛奶朱古力、75%黑朱古力、紅莓脆脆白朱古力等外，更有大受歡迎嘅開心果味！另外亦有傳統焦糖鹽味杏仁白朱古力蛋、原粒榛子黑朱古力等選擇，一於帶晒佢哋返屋企同全家分享！

Bunny in Wonderland   Lucullus    

創立於1976年嘅本地品牌，多年嚟一直製作多款高級朱古力、蛋糕等甜點，呢個復活節則以「Bunny in Wonderland」為主題，推出兩款童心滿滿嘅朱古力。驚喜朱古力復活蛋以黑朱古力製作，用小木槌輕輕敲開，就可發現多款唔同大細同色彩繽紛嘅朱古力復活蛋，重有小雞造型嘅脆米黑朱古力，啱晒dark chocolate嘅追隨者；至於復活小兔朱古力禮包，則有限定白兔造型朱古力、士多啤梨朱古力脆米，同埋原粒榛子純黑朱古力，為節日送上絲絲甜意。

黑白法芙娜朱古力法式千層酥   Cafe, Hyatt Regency (尖沙咀) 

唔少甜品控都係尖沙咀呢間酒店嘅捧場客，特別係佢哋嘅招牌傳統法式千層酥，每日由酒店餅房新鮮焗製，口感酥脆。而家有復活節限定嘅黑白法芙娜朱古力法式千層酥啊！同樣採用一小時無壓烘烤方法作層次分明嘅千層酥皮，頂層仲有法芙娜黑朱古力忌廉同朱古力薄片，白朱古力慕絲則夾喺中層，一啖入口有多重濃郁朱古力香散發出嚟。另外想要清新啲嘅選擇，則有檸檬甜酒杏仁芝士蛋糕卷，混入朱古力碎同杏仁片嘅忌廉芝士製作，海綿蛋糕亦有加入檸檬同杏仁，外層更搽埋檸檬醬同伏特加，感覺就更清爽。兩款限定蛋糕由即日起至2022年4月16日皆可預訂。 

敲敲復活蛋  Schoggi Meier

喺香港自設廠房嘅朱古力品牌，以瑞士原材料手工製作朱古力，最近推出一系列復活節主題嘅朱古力精品，包括復活小兔尾巴小手曲奇餅、以黑朱古力、乾果、果仁製成嘅復活節朱古力兔、以椰絲製成草地，上面有多隻兔仔同紅蘿蔔嘅小兔花園朱古力等。而當中最有驚喜嘅一定係近年流行嘅敲敲復活蛋。以籐籃裝住嘅復活蛋色彩吸睛鮮艷，用木槌仔敲幾敲，就可以見埋內藏嘅兔仔、雞仔、紅蘿蔔同復活蛋，小朋友一定勁興奮。朱古力口味有芒果熱情果、椰子等唔同口味。

野莓荔枝慕絲蛋糕  沙田凱悅酒店餅店 

沙田呢間酒店亦有推出復活節限定甜品，仲有3款咁多。以復活蛋為造型嘅石榴慕絲奶凍，餅底係傳統奶油酥餅，加埋金色朱古力條同石榴慕絲、奶凍，入口幼滑、清新。Cute版兔仔嗰款係野莓荔枝慕絲蛋糕，味道酸酸甜甜，荔枝慕絲中間仲有紅莓啫喱，口感豐富。餐廳亦推出應節嘅傳統十字包，軟熟質感，帶有陣陣酒香。

供應日期︰2022年4月11日至2022年4月18日 

*不包括Schoggi Meier
受條款及細則約束: https://bit.ly/ORPAY_22Easter

文：Kar