秋風起，除咗三蛇肥同可以準備狂食大閘蟹之餘，不妨都食返碗中式糖水，喺呢個乾燥嘅秋天滋潤一下。傳統中式糖水或者無呃Like賣相或者超特別口味，但食落啖啖平實嘅淡淡甜美，就已經係足夠甜入心嘅Comfort Food。
佳佳甜品 芝麻併合桃露 / 濃薑番薯糖水
佐敦呢間老字號今年成為米芝蓮街頭小食推介，雖然隨後畀業主瘋狂加租，幸好喺同區覓得新鋪位。自問貪心嘅最啱叫翻碗芝麻併合桃露，生磨所以夠哂滑，幼滑順喉唔過甜。秋天轉涼最啱加多碗濃薑番薯糖水，番薯香甜而薑汁暖胃。
源記甜品專家 蓮子桑寄生茶 / 合桃露
西環呢間糖水舖有名你叫甜品專家，老字號出品亦的確有保證。蓮子桑寄生茶清香微甜，蓮子粒粒都煲到鬆化無苦味。而合桃露就用鮮合桃磨成，香濃順滑，仲食得到粒粒合桃。
翠苑甜品專家 合桃糊燉鮮奶 / 芝麻糊燉鮮奶
北角呢間一樣叫甜品專家，一樣有唔少滋潤糖水選擇，不過比其他糖水店更出色嘅就要數到佢地嘅燉奶，食落有奶香，口感嫩滑而入口即化。無論係搭香滑細膩嘅合桃糊，定滑溜甜蜜嘅芝麻糊都咁夾。
福元湯圓 芝麻湯圓 / 花生湯圓
北角呢間小店獨沽一味專注賣湯圓，每粒湯圓都係人手搓成，皮薄餡靚。生磨芝麻餡落咗豬油，咬落有流沙效果。花生餡一樣真材實料，食得出扎實嘅花生粒口感同香味，就算配最基本嘅薑湯都夠滿足。
綠林甜品 芝麻糊 / 生磨栗子粒露
唔少糖水店都有賣芝麻糊，要搵到一間唔係就咁開粉而係生磨嘅已經難，要食到濃郁芝麻香而唔死甜更難，深水埗呢間老字號就做得到，食落感覺都健康啲。生磨栗子粒露係時令甜品，秋天栗子當造去食就最啱，雖然無芝麻糊咁杰身但一樣甜而不膩。
曾記粿品 芋泥白果 / 清心丸綠豆爽白果
上環呢間藏身於熟食市場嘅潮州粿品店，除咗好味潮州粿之外，其實佢地亦有賣兩款潮州甜品，芋泥白果杰身起砂，加埋煙韌白果口感幾特別，不過跟足潮州傳統偏甜。想食清爽啲嘅就要揀清心丸綠豆爽白果，分量十足而甜度比較啱大眾口味。
潮州合成甜品 潮式車仔糖水
一樣係潮州甜品，九龍城呢間就以車仔麵式，即係畀大家任揀糖水材料出名。想試潮州風味嘅可以嗌蓮子清心丸杮餅糖水，杮餅清甜滋潤，同鬆化蓮子同爽口清心丸最夾。另外馬蹄沙同綠豆爽亦可以一試。
開飯編輯推介：
1. 【專訪】西營盤平價點心飯店 67歲老闆堅持日做12小時
2. 9月份好評餐廳十強
熱門文章推介：
隨時接收最新資訊
讚好OpenRice專頁！