香港人又有口福喇，銅鑼灣登龍街即將又有過江龍進駐，仲要係首間東京米芝蓮一星拉麵店「蔦」(Tsuta)！唔洗飛去東京巢鴨總店就食到招牌醬油拉麵同人氣鹽味拉麵，而家就等開飯仔解構一下佢地嘅獨特之處啦！
 

香港店會沿用日本店嘅限量發售制度，每日只賣400碗，先到先得。背後最大原因係為保持保持食物質素，拉麵係即叫即做。香港店唔單止特別請嚟日本師傅坐鎮，創辦人大西祐貴先生亦會定期到港巡查，品質自然有保證！
 

日本拉麵嘅靈魂在於湯底，而蔦嘅高湯選用全雞、新鮮海蜆、魚乾同蔬菜等每日熬煮近九小時。招牌醬油拉麵會加入獨門秘方醬油、松露醬同黑松露油；而鹽味就會混入以沖繩海鹽同蒙古岩鹽調製嘅鹽味醬汁同白松露油。
 

另一主角拉麵亦相當講究，糅合蕎麥粉及三種唔同麵粉，喺店內每日手工製作。而煮麵之前師傅亦會先幫麵餅「按摩」。
 

招牌醬油拉麵一上枱就會聞到濃郁松露香味，湯底清澈唔過鹹。入口先品嘗到松露香，之後再有雞同海鮮嘅鮮味。鍾情黑松露香味嘅朋友可以撈埋叉燒上面嘅黑松露醬。叉燒柔軟而且肥瘦適中，既有脂香又有肉味。荀乾亦完全無渣。
 

而鹽味拉麵湯底更淡雅，白松露油香同鹽味醬汁配搭得宜，而且會有一陣薄荷葉嘅獨特清香。不過稍嫌薄荷味道太搶，就算撈埋上面嘅青橄欖醬入口依然以薄荷味為主。
 

拉麵除咗有兩款湯底口味任揀，亦可以選擇加配料。唔單止叉燒出色，味玉（滷溏心蛋）亦係推介。一切開流心效果非常誘人，而食落亦夠入味。
 

如果自問係加配料都係唔夠食嘅大胃王，就可以嗌返碗高湯漬飯，上面有柴魚乾同海苔，自己再將拉麵湯底倒落去，鮮味層次更豐富。
 

銅鑼灣店有約20個吧枱位，可以清楚見到拉麵即叫即製過程。而店內有自助點餐機，方便用八達通Order堂食或者外賣。聽日(19/5)開始試業，到22/5就正式開幕，想潮聖嘅朋友仔記得注意營業時間喇。
 

蔦 Tsuta
地址：銅鑼灣登龍街18號V-Point 地下2號舖
電話：3188 2639

營業時間：
5月19日 13:00-18:00
5月20日 11:30-21:00
5月21日 11:30-15:00
5月22日 11:30-21:00

文、相：Cathy
片：Kar