今個6月有好多新餐廳同過江龍開業，其中要數人氣最高嘅，非嚟自美國嘅雞蛋料理Eggslut莫屬，由3月宣佈開始，好多朋友仔都期待，希望可一試喺美國爆紅嘅滑蛋三文治，睇嚟又會引起一輪排隊潮！
Eggslut主打以雞蛋為主題嘅三文治，有炒滑蛋亦有太陽蛋，同埋雞蛋薯蓉等，無論早、午、晚餐都啱食。餐廳最初喺美國開業時，係以街頭食物貨車嘅形式出現，後嚟慢慢發展至新加坡、日本、韓國等地，而家終於嚟到香港啦。香港首間分店選址銅鑼灣，樓高兩層，以洛杉磯街頭文化為裝修主題，餐牌亦暫時同美國總店相若，供應6款蛋漢堡同三文治，以及幾款小食同飲品。不過負責人透露，之後就會有香港限定版登場喇。
招牌炒滑蛋三文治
6款常設漢堡同三文治中，以招牌炒滑蛋三文治最為signature，亦係餐廳發展指導員Zayra Vela最推介大家要試嘅款式。餐廳特意選用嚟自紐西蘭嘅走地雞，仲要係不多於89星期大嘅母雞所生嘅雞蛋製作，以確保蛋黃大小、蛋汁多少同埋蛋香味都係符合標準。而且餐廳對於用料一啲都唔吝嗇，Zayra Vela透露大約每4份炒滑蛋三文治，就會用上9隻雞蛋，搭配埋細蔥、焦糖洋蔥、車打芝士、沙律醬同秘製醬汁等餡料，食落雞蛋的確係幾滑身嘅，而且仲有微甜同微辣，不過就略為偏鹹咗少少。
芝士漢堡
頂級USDA三角脊扒三文治(左)、雞肉腸蛋芝士三文治 (右)
至於想有肉落肚嘅話，則可選芝士漢堡或頂級USDA三角脊扒三文治，後者更搭有流心蛋同紅洋蔥火箭菜沙律，有肉有菜，配搭均衡。自家研發嘅布里歐麵包口感亦夠鬆軟，溫馨小提示，如果食開低碳嘅朋友仔，可以選擇以蔬菜代替包身，變成沙律呀。
招牌蛋薯蓉加棍法麵包 (左)、松露迷你薯餅 (右)
至於小食方面，有曲奇亦有薯餅等選擇。其中，招牌蛋薯蓉加棍法麵包將雞蛋同薯蓉放入玻璃樽內，經低溫慢煮後再灑上蔥花同海鹽簡單調味，拎片脆口嘅法包蘸落去，更驚喜可見橙黃色蛋漿汁，不過整體味道同樣偏鹹。
煙肉蛋芝士三文治 (左)、蛋沙律三文治 (右)
最後可能好多朋友仔都有個疑惑，明明睇落係漢堡包咁嘅樣，點解叫三文治呢？Zayra Vela解釋漢堡其實都係三文治嘅一種，漢堡主要係指餡料中夾有漢堡肉類嘅包，而三文治就可以任意配搭任何嘅餡料喎。
Eggslut
地址: 銅鑼灣記利佐治街11-19號Fashion Walk地下及1樓
開業日期：6月16日（星期五）下午2時正
文：Kar
相、片：YanYan
