喺香港地講到日式放題，選擇真係多到數唔晒，不過可以睇埋靚景的話就唔多啦。荃灣最近新開一間日式放題，賣點就係食客可以飽覽無敵海景，而且位置相當闊落，食都食得舒服啲啦。

餐廳佔地過萬呎，除咗室內位置外仲有戶外露台餐座，近排涼涼地就最啱啦！室內裝潢以日式和室風為主，設有卡位及廂房，整體感覺簡單舒適。價錢方面就係正常日式放題價錢，平日晚市放題特惠時段成人$258一位；高峰時段$278，不過有埋呢個海景即刻抵返晒。

食物方面，供應過百款食物、甜品及飲品無限量供應。講明放題，當然唔少得回本嘅刺身，刺身質素達標，值得食嘅有油甘魚、馬刀貝、帆立貝及赤貝刺身。至於壽司亦有不少選擇，如芒果軟殼蟹、芝士炸蝦卷及店舖獨有的品川壽司。另外有海膽壽司選擇，不過海膽質素尚有進步空間。

熟食方面表現就唔錯，如黃金燒帆立貝大粒厚肉，而且好惹味，都係其中一個回本之選；芝麻雞翼炸得香脆，雞肉亦充滿肉汁。炸蠔亦熱辣辣呈上枱，炸得鬆脆，鹽燒牛舌水準亦正常。

另外較特別有呢個鹽燒油甘魚頭腩，油甘魚頭腩充滿魚油香，連埋檸檬汁食恰到好處。而粟米蝦粥都清淡鮮甜～

而出面都設有自助區，供應熱食及多款冷盤，雪糕方面除咗朱古力同雲呢拿，仲有港式奶茶及菠蘿椰子呢啲特別啲嘅口味，仲有日本清酒任飲啊！

品川日本料理

地址: 荃灣大河道100號海之戀商場3樓3013號舖

文: Yanica

相、片: Tom Li