呢間精品咖啡店之前只有西環店，最近終於過海開過嚟尖沙咀！佢哋主打多款賣相夢幻精緻嘅無麩質蛋糕，亦有純素、甚至生酮嘅輕食、飲品選擇。打卡之餘亦滿足到大家唔同飲食需求。
 

Infiniti C新店位於尖東最新話題商場裡面，裝修貫徹白色同藍色主調，感覺優雅舒適。新店供應多款自家製蛋糕、輕食、精品咖啡同其他特飲，唔少都係適合無麩質、純素或者生酮飲食嘅。
 

KETO CAKE - AUDREY LOVE（$88）

新店招牌蛋糕以柯德莉·夏萍優雅風設計，玫瑰狀嘅藍色同白色忌廉令蛋糕睇起嚟特別夢幻！而且忌廉口感亦非常輕盈唔會太甜膩。而裡面係混合咗新鮮雲呢拿籽嘅蛋糕同雜莓忌廉，蛋糕鬆軟而雜莓忌廉嘅酸甜味道自然討喜，整體味道平衡。
 

FANTASY ACAI BOWL（$88）

同樣係夢幻嘅藍色，呢個巴西莓碗就落咗Super Food巴西莓粉同藍藻粉，再加椰奶、香蕉等打成類似果昔咁嘅冰涼滑身口感，上面再加上唔同時令水果、椰子肉、奇亞籽等配料。食落香蕉同椰奶味道最突出，非常易入口。
 

SOURDOUGH MIXED & MATCH - STRAWBERRY WITH AVOCADO PASTE（$78）

多士各有三款鹹食同甜食口味，可以選擇純素嘅米麵包或者生酮素麵包（$93）。米麵包係餐廳自家製，口感比一般麵包濕潤，帶少少米香。而牛油果醬有經過調味，所以配埋士多啤梨片食落無想象中咁甜。
 

JAPANESE FRUIT TARTINE（$72）

同樣用咗純素嘅米麵包，今次主角就變成上面嘅椰奶忌廉同新鮮水果！水果每日唔同，而下面嘅忌廉椰子香味濃郁，味道微甜所以唔會蓋過水果原味，配搭得宜。
 

 

KETO - DETOX MILKSHAKE （$84）

餐廳最近新出更多適合生酮飲食嘅飲品，好似呢杯顏色繽紛仲有拉花圖案嘅就用咗牛油果、青瓜、豆奶等打成奶昔，再加士多啤梨同Super Food奇亞籽。可以先試咗奶昔嘅原味，再加士多啤梨同奇亞籽一齊食增加口感層次。
 

BLUE MALLOW FANTASY TEA（$62）

見到藍色大家可能都會估係蝶豆花茶？其實係藍錦葵茶呀！倒入檸檬汁之後會由藍色變成紫紅色！另外一壺係甜菊糖漿，係一種天然代糖，換而言之係零卡路里，而且有糖尿病嘅朋友都可以飲啦。
 

Infiniti C
地址：尖沙咀梳士巴利道18號Victoria Dockside K11 Musea 2樓LA202號舖

文、相、片：Cathy