捱過無公眾假期嘅3月，嚟到4月唔單止有清明節假，仲有復活節4日連假！不過對於各位爸爸媽媽嚟講，可能就有少少頭痛......唔緊要！開飯仔幫大家搵咗6間酒店嘅復活節主題自助餐，最緊要嘅係佢地同時都會有唔同嘅工作坊或者遊戲俾小朋友玩，咁就大朋友同小朋友都保證可以開心咁過佳節啦。
 

雅苑座　　自助午餐+馬卡龍製作班

尖沙咀呢間酒店餐廳嘅自助餐一向都有保證，而今次佢地會喺4月14至17號供應「復活節自助午餐」，大人可以嘆海鮮冷盤，包括長腳蟹、翡翠螺同蜆，另外仲有燒羊肉同燒肉眼等美食。亦有小朋友最愛嘅炸魚薯條、迷你漢堡包同即製棉花糖。

而4月15至16號呢兩日仲有馬卡龍製作班，可以跟酒店行政糕餅總廚學整甜美馬卡龍！仲有同賓尼兔合照，同跟小丑學扭汽球嘅活動。
 

花月庭　　日式爐端燒+朱古力工作坊

旺角呢間餐廳以大熱嘅日式爐端燒主題自助餐嘅「要[瀛]．就要[串]得起自助晚餐」為基本，再加推復活節主題美食同活動。日式爐端燒包括包括網燒珍寶蠔、七味燒三文魚鰭、日本產黑豚串等。

而加推嘅復活節食物就包括一系列雞蛋同雞嘅美食，亦有甘筍芝士蛋糕、兔形棉花糖等得意甜品。4月14號到17號期間，惠顧自助晚餐嘅小朋友仲可以參加朱古力小雞工作坊喔！
 

城景閣　　海鮮自助晚餐+獨一無二拿破崙

油麻地呢間餐廳最近就搞緊「蝦螺滋味‧海鮮自助晚餐」，以有機鮮蝦同法國田螺做主打，必食推介包括牛油果螺肉有機虎蝦沙律配越南米紙卷同酥炸法式田螺有機虎蝦雲吞。另外當然亦唔少得港人最愛之一生蠔！

4月14號到17號去食自助餐，仲可以免費參加「最愛是你」拿破崙餅製作，只要喺食自助餐前3日將指定相片電郵畀酒店，當日就可以自己製作獨一無二嘅拿破崙餅啦！另外仲有「最愛扭扭兔」工作坊同一系列節慶活節。
 

2+2 Café　　鮮味自助午/晚餐+奇趣復活蛋活動

而沙田呢間酒店餐廳嘅自助午餐同晚餐都會供應一系列復活節主題美食，包括雞仔形烚蛋、兔子形酥皮三文魚同甘筍芝士蛋糕等。分別係「鮮味．手作自助午餐」以炮製手握手卷同刺身等日式美食為主，「尋味龍躉海鮮自助晚餐」就有本地漁場養殖嘅優質龍躉菜式。

4月14號到17號去食自助午餐同晚餐都可以參加佢地舉辦嘅活動，包括復活蛋尋寶大作戰同主題拍照區，而且每位小朋友都會獲贈一份朱古力奇趣復活蛋，敲開裡面仲有神秘小禮物！
 

Promenade 西餐廳　　自助午餐+冬甩/薄餅製作班

呢間位於紅磡嘅酒店餐廳就有「國際美食自助午餐」，不過對於唔少小朋友或者女士嚟講，重點應該係一系列嘅復活節甜品！復活節雞蛋布丁特別用彩蛋裝住，記得相機食先；西班牙街頭小食Churros吉拿棒香脆甜美，而且仲可以自由點上多款朱古力醬。

酒店亦特別安排咗薄餅製作班同冬甩製作班，分別畀4月14至15號同16至17號食自助午餐或自助下午茶餐嘅小朋友參加。想免費嘅話就要係頭20個預訂或者喺酒店eShop訂購啦。
 

MoMo Café　　自助午餐+任玩吹氣城堡

最後沙田呢間餐廳喺4月14至17號期間亦有「精彩復活節自助餐」，可以任食海南雞飯、陳醋牛肋肉、蟹肉金菇扒素千層等特色美食，另外亦有各款中西甜品，例如蜜瓜蘆薈珍珠露、草莓慕絲酥條，同抹茶芝士蛋糕。

復活節當然唔少得一系列主題甜品，包括復活節十字麵包、薑味胡蘿蔔蛋糕、色彩繽紛嘅復活蛋同造型趣致嘅曲奇餅等。而且去食自助午餐嘅小朋友仲可以免費去大堂嘅吹氣城堡大玩特玩，小心小朋友玩到樂而忘返啊！
 

文：Cathy