講起荔枝角工廈，相信唔少吃貨第一時間會諗起程班長台灣美食，不過大家又知唔知，除咗賣正宗台灣菜起家嘅程班長之外，其實同區工廈仲有唔同地方菜式餐廳都等緊大家去試呢？由最熟悉嘅港式茶記到比較少食嘅墨西哥菜，由一班人聚餐啱哂嘅意大利菜到打工仔自私食嘅高質西餐，開飯仔都有介紹！
高CP值墨西哥風味 Picoso
圖：au9
平時好少叫墨西哥菜？唔緊要，呢間由香港人開設嘅工廈墨西哥菜館非常貼心，Menu上面唔少菜式都係圖文並茂。最多人嗌嘅係足料好味嘅Tortilla烤玉米餅皮，用木架上枱，清楚見到入面填滿生菜、粟米、番茄粒、酸忌廉同牛油果醬等餡料，先聲奪人。墨式秘製芝士雞同招牌玉米薄脆一樣抵食，最後嘆埋個玉桂蘋果薄餅做甜品，完滿也。
簡約企理炭燒西餐 Number Fifteen
唔少食家都話呢棟工廈雖然有部舊式電梯，但上到餐廳白色同木系嘅簡約裝修加上環境寬敞完全令人Relax落嚟。而最推介嘅係佢地嘅碳烤主菜，炭燒西班牙黑毛豬肉眼配松露油汁及鵝肝多士嘅黑毛豬肉夠厚身又鎖到肉汁，鵝肝亦煎得鬆化香脆。炭燒美國特級西冷配牛肝菌汁富炭燒香，肉質有咬口唔過肥。
雞全部都係海南雞 為食雞私房工場
「雞有雞味」喺呢幾年由飲食節目主持人無嘢搵嘢講嘅對白，變成唔少饕客嘅追求。而呢間就真正都到「食雞有雞味」！招牌菜泰式去骨海南雞飯幾乎每枱都會有一碟，雞肉肥瘦適中，有雞油香口感夠滑溜，點埋甜豉油或者泰式醬就啱哂送飯。不過有食家覺得黃油雞飯稍嫌過淋，改善埋就更抵食喇。另外泰式鹵豬脾飯都係推介。
隱世正宗意大利Pizza Pizza Piazza
荔枝角呢間意大利餐館其實喺工廈地舖，不過門口隱蔽招牌又唔明顯，特別有種隱世小店嘅感覺。嚟到呢度唔少人都會點佢地嘅12吋薄批，批底有嚼勁而批邊卜卜脆。Pizza餡料有16種唔同口味，包括芝士迷最愛嘅四式芝士。而且其他食物亦有水準，忌廉蟹肉大啡菇有芝士之餘Keep到Juicy，意粉甜品等都有板有眼，啱哂一班Friend聚餐。
親子餐廳食日式燒肉 焱咲自煮理平板燒概念店
講到聚餐，有小朋友嘅爸爸媽媽們揀餐廳就更頭痛，幸好荔枝角工廈呢度有間日式平板燒餐廳相當用心，唔單止有個兒童樂園畀小朋友任玩，燒嘢食嘅平板仲係紅外線傳熱，少啲油煙大朋友小朋友都可以食得健康啲。食材夠新鮮，老闆又會講解應該點燒，簡單落少少鹽同胡椒粉，平時少落廚嘅朋友都可以燒得好味。
工業風美式漢堡 The Americano
圖：P.J.
一樣啖啖肉深受食肉獸喜愛嘅，仲有分量大嘅美式漢堡！呢間美國菜餐廳最出名嘅就係招牌菜德州燒烤漢堡，肉扒厚身肉味濃郁，加埋煙肉、炸洋葱圈、芝士、生菜，同軟熟而挺身嘅漢堡包，成個Package就係太完美。另外仲有素食漢堡、All day breakfast、eggs benedict、Nachos、燒烤骨等選擇，無論係唔係食肉獸或者漢堡Fans應該都搵到心頭好。
懷舊茶記瑞士雞翼 瑞士咖啡室
或者只有香港人先明白，瑞士雞翼其實唔係嚟自瑞士，而係真真切切屬於香港茶餐廳嘅味道。呢間懷舊咖啡室最出名嘅就係瑞士雞翼同瑞士汁牛河。主角瑞士汁夠哂香濃，甜味啱啱好，配雞翼夠入味，點撈麵餐嘅話仲可以請侍應畀多碗瑞士汁。炒牛河就夠惹味，不過就油膩咗啲，要扣少少分。想食健康啲可以點蕃茄濃湯通粉。
Food Court高質自選西餐 Pati by Lassana
呢棟工廈內藏一個唔少附近打工仔女先識去嘅Food Court，而當中最受歡迎嘅，就要數到呢間選擇夠多嘅西餐廳喇。自選午餐可以揀一款沙律、配菜、主菜同飲品各一，相當豐富。而且選擇多達四至八款任意配搭，沙律同配菜都有用心配搭唔係行貨，主菜有麵包或者肉類菜式。最後飲品就推介熱咖啡，質素比一般Food Court出品更高質！
開飯編輯推介：
3. 10月份好評餐廳十強
熱門文章推介：
1. 5間新晉龍蝦包餐廳大比拼
3. 油麻地特色美食地圖
隨時接收最新資訊
讚好OpenRice專頁！
