譚仔三哥米線係唔少港人嘅食堂，最近品牌宣布推出全新概念店「三哥燙」，主打三哥風格嘅麻辣燙，客人可以自行任夾食材按重量收費，想要咩湯底同配料，完全可以自由配搭！今次開飯仔喺開業首日同大家直擊，睇睇同平時嘅譚仔三哥有咩唔同啦～

連鎖米線品牌全新麻辣燙副線 按重量收費

「三哥燙」有別於傳統譚仔三哥米線嘅食法，餐廳主打五步曲「拎、攞、磅、揀、嗌」創意食法，客人可以先喺門口位置拎夾同容器去食材櫃自助夾心水配料，當中有超過60款食材同麵底，除咗平時米線店會見到嘅丸類、肉類配料外，仲有多款「三哥燙」獨家限定食材，例如蝦、蜆、魷魚、風琴豆腐串、珍寶蟹柳、秋葵、海帶結、寬薯粉、米粉、公仔麵等等，體驗有啲似打邊爐放題咁，都幾有新鮮感。

譚仔三哥全新概念店「三哥燙」主打按配料磅重收費嘅麻辣燙體驗

自助區供應逾60款配料（$16.8/100g）

部分特選食材嘅肉類同海鮮價錢按每碟計算（$18/碟）

五步曲食法：自選湯底+煮法

選好配料同所需分量後，就可以交畀店員磅重。食客可以8選1湯底同2種特色燙法，湯底供應款式同米線店一樣，分別有清湯、麻辣湯、煳辣湯、酸辣湯、番茄湯、水煮湯、重慶三哥酸辣湯同埋砂砂湯，辣度同樣可選10小辣至特辣等級。而特色燙法就有「姐姐燙」同「獨自燙」，前者即係交由店員幫你煮，後者則係自己爐具煮。

食材按重量收費，店員會預先扣除器皿重量

夾好配料，再到結算區揀湯底同加配項目

獨自燙（左）3pm後供應並以套餐形式送上，跟配1份配料同1款特調醬汁；姐姐燙（右）

初嘗試嘅食客推介可以叫自己食慣嘅湯底口味並加少少辣度，令麻辣燙湯底更惹味。配料方面，開飯仔推介吸湯力十足嘅超長珍寶蟹柳同蜂巢豆腐，吸滿湯汁帶微辣，好香口。海鮮亦推介蝦、魷魚同魚片，性價比幾高～

據三哥姐姐說法，配料超過300g就會用長形碗盛裝

推介配料：珍寶蟹柳（左）同鴨血（右）

海鮮選擇都唔少，有魚片（左）、蜆（右）、蝦、魷魚等

同時亦可以加配小食、飲品同甜品

三哥燙
地址：元朗鳳翔路2-6號加點1樓C110號舖

文：Sharon
相、片：Tom