香港首賣新品！一間嚟自東京嘅過江龍辣麻拉味噌麵店，喺銅鑼灣店嘅相連店舖開設副線，以牛骨湯拉麵作招徠。新店提供湯麵、沾麵同拌麵款式，其中辣麻口味則與原有品牌一樣，可以自選辣度同麻度；另外重有特色牛丼畀大家揀，即睇邊款啱你口味～

新拉麵概念×招牌牛骨湯

品牌創辦人三浦社長

日本拉麵經常以豚骨、魚介、雞骨製作拉麵湯頭，但品牌創辦人三浦社長認為用牛骨熬煮最香甜，而且同辣味非常搭配，於是兩年前開始萌生開牛骨湯拉麵店嘅念頭。但因為疫情影響，未能夠喺日本開展步伐，而香港合作夥伴想嘗試喺香港率先推出，就決定喺銅鑼灣開第一間牛骨湯拉麵店。

牛骨湯混合特製黑色拉麵汁

招牌牛骨拉麵［原味］（$100）

新店同原有品牌鬼金棒概念完全唔同，除咗供應湯麵，重有沾麵同拌麵，皆因三浦社長認為拉麵冇固定形式，而「沾麵」、「拌麵」對佢嚟講都係拉麵款式之一。另外營運經理Carol表示，今次拉麵嘅靈魂牛骨湯棄用一般香港麵店以牛背骨熬湯嘅做法，改用牛腿骨，一鍋用上40kg牛腿骨，就可以煲出最奶白色嘅牛骨湯，味道清甜濃厚；再混合特製嘅黑色拉麵汁，鹹鮮味恰到好處。

安格斯牛叉燒外香內嫩

牛叉燒以安格斯西冷部位製作

牛叉燒經過慢煮、煎香等步驟再刨成片，邊位微焦，肉質粉嫩

招牌牛骨拉麵所配嘅「牛叉燒」選用美國安格斯西冷部位，叉燒慢煮後蘸上秘製醬汁，再將肉條四面煎至焦香，就可以刨片上碟，入口外香內嫩；另外配上骨膠原豐富嘅慢煮安格斯牛筋、洋蔥粒、粟米仔等提升口感同味道層次。

特上A4和牛辣麻牛骨拉麵（$165）

如果想惹味啲，可以揀辣麻口味，社長建議揀小辣小麻，咁就唔會蓋過牛骨湯嘅甜味。你重可以升級牛肉，試下選用日本和牛製作嘅特上A4和牛辣麻牛骨拉麵，肉片火炙後更加香口，而且逼出油分可以減輕油膩感。

創作自家製「牛油喳」、特色牛丼

辣麻牛骨沾麵（$100）

辣麻牛油拌麵（$105）嘅底汁，混合牛骨湯同安格斯牛脂煮成嘅牛油

辣麻牛骨沾麵、辣麻牛油拌麵都係配安格斯牛叉燒，不過會加入以港式油喳麵為靈感嘅自家製「牛油喳」，即係將安格斯牛筋同牛脂炸至酥脆！沾麵可以加入湯中吸收湯汁，拌麵即可以先試一啖再拌勻。

牛油喳吸收湯汁後都好脆口

麵條方面，品牌同日本合作夥伴研發新配方，再經香港麵廠製作鮮麵，口感彈牙易掛汁。除咗沾麵配粗身麵條外，其他麵款都用幼麵，而拌麵更加量為1個半幼麵𠻹。

鮮麵軟硬度、彈性適中（左：粗麵，右：幼麵）

餐廳特設3款丼飯，包括傳統日本生蛋黃拌飯，以及用拉麵主要配料製作嘅月見安格斯牛肉丼、秘製醬汁慢煮牛筋丼。牛肉丼會淋上特製嘅鹹香醬汁，而牛筋丼嘅牛筋慢煮4小時後相當軟腍入味。

牛丼（$55-90）用料十足，餸料完全覆蓋飯面

牛筋黏度高，而且坊間少見，值得一試

鬼金棒牛骨辣麻拉麵

地址：銅鑼灣謝斐道528號地舖

文：Cathy.C
相、片：Yan Yan