旺角黑布街一向都係手工啤酒愛好者嘅聚腳點，最近又開多間taproom啦，係由本地啤酒廠門神開辦嘅，可以話係百花齊放。Taproom嘅裝修貫徹門神一向嘅風格，由內到外都富有中國傳統特色，食物方面除咗有各款佐酒小食外，竟然仲有啲中式點心同甜品！

花雕醉雞翼細細碟但疊埋疊埋都有唔少隻呀，一捧出嚟已經聞到花雕酒香。原來師傅預先浸咗成晚㗎，仲特地製成單骨雞翼，入味之亦方便進食。

牛魔王即係牛肉包，以中式饅頭夾住幾片惹味嘅牛肉，加入芝麻、香蔥、紫洋蔥、黑椒等調味，又香口又juicy。食飽飽先飲多幾啖酒，就唔怕空肚易醉啦。

另外由於門神創辦人Laszlo係墨西哥人，舖頭多多少少都會有返啲墨西哥小食嘅，例如多款佐酒必備嘅Tacos。炸蒜香蝦夠香口，想清新健康啲嘅就有藍莓紅菜頭選擇。

重點當然係手工啤酒啦，On tap嘅以門神手工啤酒為主，想要果香味重啲嘅，可以揀舞獅，係款Apple Cider嚟。但又比平時飲開嘅cider冇咁甜，果酸味重啲啲，近似真‧蘋果酸嗰隻，好易入口。

南雲同北雲都係加入咗普洱茶去釀製，北雲係用嘅係熟普洱，酒色望落都比較深色，係款充滿烘焙麥芽香氣嘅black lager。至於雷公ale，酒花味突出，滲有陣陣熱帶果香。

另外，生啤頭上都會有幾款guest tap供應，好似呢杯比特堡拉格啤酒咁，初頭飲嗰陣麥芽味甜香，慢慢以甘味作結。

門角
地址：旺角山東街88號地舖

文、相、片：Kar