鍾情韓食嘅朋友相信對呢間嚟自首爾嘅餐廳唔陌生，品牌喺首爾開業40年，係當地人氣韓牛專門店嘅老字號之一，晚市平均要等2個鐘先食到，認真誇張！今次登陸香港開設首間海外分店，除咗帶嚟招牌菜解酒湯同牛腸火鍋外，仲有香港限定菜式𠻹～

韓國韓牛老字號 招牌傳統解酒湯

餐廳選址喺灣仔，裝潢風格仿照韓國總店設計，以古典嘅深色木材為主調，佔地3,000呎，空間感頗大。品牌多年嚟都係主打名物解酒湯，香港人或者會覺得陌生，但其實解酒湯喺百幾年前已經出現，當時韓國仁川港開港，唔少碼頭勞動者會將正餐剩下嘅內臟、碎肉、骨頭等用嚟熬湯，用作酒後品嚐。時至今日，成為韓國人聚餐、消除宿醉嘅主要美食。

餐廳主打由內臟、韓牛熬成嘅一系列湯鍋

解酒湯喺韓國店月銷量多達32,000碗，可見受歡迎程度！香港店除咗有人氣牛肚解酒湯外，仲有限定嘅餃子解酒湯，湯頭以內臟為主料，加入牛骨、韓國牛肚、蘿蔔菜乾同芽菜等多種材料熬煮幾個鐘，配上微辣醬料炮製而成。牛肚分量幾多，湯頭清淡唔腥、入口微辣，配上爽口牛肚，味道幾特別。

牛肚解酒湯（$98）跟配2款前菜同白飯

店員推介可以喺湯底加上幾滴辣椒油，食落更香口

餃子解酒湯係香港店限定菜式，內臟解酒湯底搭配韓國牛肚餃子，富滿腹感之餘又有香辣後勁，醒胃效果一流啊！

餃子解酒湯（$78）有巨型牛肚餃子，配上湯底夠飽肚

必試牛腸火鍋+奶白牛內臟湯

餐廳主打另一名物——牛腸火鍋喺香港都食到，火鍋湯底以店舖特製醬料作主要調味，加上嫩滑牛腸、蘑菇同多款蔬菜熬煮，並以最高級別嘅1++等級韓牛燉成火鍋，湯底飲落味道濃厚惹味， 仲有少少香辣辛口刺激味蕾。牛腸口感嫩滑而且爽口，仲要冇腥味～

牛腸火鍋設有2個分量，擺盤吸引（$488/中；$688/大）

雖然湯底有辣勁，但唔會蓋過牛腸獨有味道，富有嚼勁

除咗解酒湯，呢度仲有其他暖笠笠湯鍋，當中牛內臟湯同樣好有特色。於牛骨湯基底加上多款韓牛內臟烹煮，呈奶白色望落好濃郁，味道清淡，但飲落帶豐富油脂感又唔會過於油膩，係香港少有嘅味道。

牛內臟湯（$108）有足料韓牛內臟，清淡湯底更能突出內臟香氣

韓鍋酒舍
地址：灣仔聯發街18號地舖

文：Sharon
相、片：Yan Yan