千層蛋撻近年成為甜品界新寵，酥脆鬆化嘅層層酥皮，包住滑溜香濃嘅蛋漿，每一啖都係滿滿嘅幸福感！今次就嚴選香港5間必試千層蛋撻店，即刻睇吓有冇你心水！
福岡人氣麵包店 MOROPAIN
圖：熊仔美食專員
福岡人氣麵包店，香港係品牌首間海外分店！主打日式烘焙，擁有超過40款各式各樣嘅包點，店內更設有coffee corner，可以一邊嘆咖啡，一邊享受精緻日式烘焙。佢哋嘅日式千層蛋撻系列用上法式千層酥皮，焗製時間經過精心調整，確保外層長時間保持酥脆，無論熱食定凍食都咁精彩。千層蛋撻一共有5個口味，包括原味、朱古力、宇治抹茶、意大利開心果同埋紅茶；朱古力帶有微苦甘香嘅濃郁可可風味，平衡蛋撻嘅甜度；宇治抹茶則茶味濃郁，回甘悠長，適合鍾意和風甜品嘅朋友。
太古人氣千層蛋撻 Baker by Lubuds
圖：呢間位於太古城中心嘅麵包店以精緻烘焙聞名，招牌千層蛋撻成為唔少甜品迷嘅心頭好。蛋撻外層以千層牛角包酥皮為靈感，每一層都酥脆分明，咬落去帶少少煙韌感，層次感豐富。雖然放到第二日依然有一定口感，但建議即日享用或翻焗，口感更佳！內餡蛋漿則香濃滑溜，甜度適中，唔會過甜，蛋香味突出，口感細膩。溫馨提示每日三個時段新鮮出爐，分別係9:30、12:00、15:00，如果想試新鮮蛋撻，記得提早去排隊！
開心果醬酸種蛋撻 Puff Bake
圖：歐陸式烘焙店，由前五星酒店烘焙主廚主理。酸種千層蛋撻外皮酥脆，內餡滑溜，帶有獨特嘅酸種香氣，餡料質感順滑，蛋香濃郁，而且唔會太甜，輕盈而不膩，絕對係必試之選！除咗原味亦有開心果蛋撻，面層灑滿開心果碎，內餡夾雜開心果醬，帶出陣陣堅果香。
拿破崙焦糖千層撻 Hashtag B
圖：人氣高企嘅千層撻專門店，喺港、九、新界都有分店，方便大家去嚐鮮！招牌拿破崙焦糖千層撻一拎起就覺得好重身，超足料～酥皮好香脆，咬落鬆化，帶微微牛油香，而佢嘅焦糖流心甜度恰到好處，焦糖味濃郁，帶點微苦平衡甜膩感。開心果千層撻內餡有濃郁開心果醬，配搭酥脆千層，食落有堅果香同奶香，層次豐富！
香濃抺茶麻糬丹麥酥撻 Vission Bakery
圖：fxfxfh
開業以嚟人氣都極高，經常大排長龍～最多人排隊搶購嘅絕對係抹茶麻糬丹麥酥撻，外皮層層酥脆，帶牛油香；抹茶味道香濃微甘，唔會過甜，中間嘅麻糬夠彈牙又唔會太軟爛，一口咬落去，抹茶醬、麻糬、丹麥酥皮交織出豐富口感！另外仲有Tiramisu同開心果口味，同樣值得一試～
文：Yanica
編：Cathy
