美食車開咗就咗嚟一年，先後有3架「車」成功變做實體舖，其中一間就係呢間專食一字雞翼嘅餐廳。入舖後，多咗幾種口味嘅雞翼，要數最吸引嘅，唔使問：鹹蛋黃炸雞翼！

 車打芝士味炸一字雞翼

實體店主要賣兩種雞翼，即叫即炸嘅一字雞翼，以及創新嘅慢煮雞翼。先講一字雞翼，所謂一字雞翼，即係單骨雞翼。全部預先喺工場到拆好骨、醃製好，然後再喺舖頭即叫即炸。好似車打芝士味咁，先撈埋韓國炸粉，炸起後又再灑埋秘製椒鹽粉，最後當然就係淋上主角，自家調製嘅芝士醬啦，用卡夫芝士、車打芝士等幾種芝士混製而成，所以芝士味好香濃，但又唔會太膩喎，至於雞翼外層嘅炸粉薄薄地好脆口，雞肉嫩滑，芝士控要試下。

 黃金脆脆炸一字雞翼（即鹹蛋黃味）

最新研製嘅係鹹蛋黃炸雞翼，以鹹蛋黃、鹹蛋黃粉、新鮮蛋黃碎等煮成醬之後，撈埋炸雞翼一齊炒香佢，最後再加埋乾身嘅鹹蛋黃碎，一盒6隻嘅雞翼就出得爐喇，鹹鹹香香好難抗拒。而且因為單骨嘅關係，即使邊行邊食都好方便，要「一肉不漏」都冇難度。

 極品麻辣王雞翼

另外，慢煮雞翼都有3款口味，包括香葱蒜蓉、冬陰公同麻辣。先將原隻雞翼蘸上各自嘅醃料，入袋，放入真空機，然後就用慢煮機處理3個鐘，令到雞翼更JUICY、更入味。好多人都鍾意嘅麻辣味，麻度的確幾夠！

 沙爹牛肉包

舖頭仲有其他小食同飲品，好似咖喱魷魚、咖喱魚蛋之類，仲有沙爹牛肉包。平時食牛麵就食得多，今次將啲牛肉夾入個包中間食，一樣咁香口，但就要食得小心啲啦，足料到好易跌緊嚿或者漏汁出嚟呀。

 檸茶bb

舖頭有少量座位嘅，主要都係以外賣為主。講開又講，舖頭開喺TKO Gateway入面，嗰度啱啱新開咗個Food Lane，有掃街小食同壽司之類食呀。

豪園小食 - 炸一字雞翼專門店
地址：將軍澳常寧路2號TKO Gateway地下 Food Lane EF 24號舖

文、相：Kar