香港近年多咗唔少主題Cafe，而呢間就以魔法做主題，裝修同擺設都有用心，包括《哈利波特》當中經典嘅九又四分之三月台。食物水準都唔錯，飲品更加有特色，最啱各位「麻瓜」嚟醫肚兼自拍！
 

9 3/4 cafe用得魔法嚟做主題，當然唔少得喺餐廳裡面加入魔法元素啦：仿紅磚牆、高身書櫃、貓頭鷹公仔、水晶球等等，唔少擺設都係餐廳老闆們嘅私人珍藏。但最吸引眼球嘅一定係大門一開就見到嘅九又四分之三月台！各位不妨戴埋圓框眼鏡影返張相嚟打卡。
 

影完相當然就要坐低食嘢啦，餐廳提供菜式以西餐為主，有齊湯、沙律、意粉、意大利飯同主菜。先介紹呢度嘅招牌菜之一催狂魔之吻，其實即係紅酒燴牛尾。牛尾夠軟腍，一咬就骨肉分離。醬汁有少少紅酒嘅酸味，配埋蔬菜粒係開胃嘅。
 

而霍格華茲的盛宴真身就係材料豐富嘅All day breakfast，有脆皮腸、煙肉、炒滑蛋、蕃茄、漢堡扒、沙律菜同香草包。滑蛋仲特別選用日本雞蛋再加入日本牛奶，難怪食落幾滑而且有蛋汁，如果蛋香再重啲就更好喇。香草包烘得夠脆，加埋蒜蓉香味係亮點之一。店主仲話香草麵包之後會不定期更換，絕對唔係普通行貨。
 

有嘢食當然亦要有嘢飲，奶油啤酒其實無任何酒精成分嘅，而係用幾款唔同梳打溝埋再擠上鮮忌廉，飲落味道有啲似忌廉溝鮮奶，不過味道以忌廉汽水為主。
 

而愛情魔藥聽落夠浪漫，真身士多啤梨乳酪沙冰又的確幾啱各位少女麻瓜飲，乳酪同士多啤梨都係酸酸甜甜咁，打成沙冰飲落清爽而唔會過分甜膩。加上用燈膽玻璃杯上枱，杯底仲會用唔同顏色燈裝飾，記得相機飲先。
 

Cafe仲有蛋糕供應，最搶鏡嘅自然嘅魔法主題Cupcake，係店主特別搵相熟朋友製造，上面翻糖裝飾有唔同得意造型，而下面就係牛油蛋糕。
 

雖然Cafe仲係試業中，但已經吸引到唔少魔法迷訂枱，呢個星期晚市已經Full Booking喇！建議大家如果想留多啲時間影相嘅話可以下晝嚟，或者盡量提早訂枱。提埋你如果夠八個人一齊去食嘅話，可以請店主預留房裡面嘅大枱，幻想自己坐喺霍格華茲入面食飯都得，得咗。
 

9 3/4 cafe
旺角煙廠街9號興發商業大廈4樓404室

文、相、片：Cathy