OpenRice有3大排行榜，捕捉時下最吸引大家嘅餐廳，即睇11月嘅「最多收藏」、「最高瀏覽」同「本月熱門」No.1係邊間！

【最多收藏】足料泰國菜 Milu Thai มิลู่ไทย (百樂中心)   

圖：Sofoodiaries.hk、daitouball

泰國菜一向有捧場客，尤其天氣開始涼，更加想食開胃嘅惹味菜式，而銅鑼灣呢間泰國菜館就以足料抵食見稱。佢嘅火山排骨大大件，但煮得非常軟腍，好容易就可以將肉撕起，加上特調醬汁酸辣鹹香，唔少人都會試。另外咖喱三重奏一次食勻青、紅、黃咖喱，配上扇貝、炸魚柳、青口、蝦等多款海鮮好豐富，咖喱鍋仲用爐熱住上keep warm，冬天食啱晒。

【最高瀏覽】自助即捕活海鮮 千海水產海鮮火鍋放題  

圖：TommyWong4080、baseting

火鍋放題絕對係冷天必食之選，九龍灣呢間新店仲有一排魚缸供應蟹、鮑魚、蜆等任食嘅即捕海鮮，加埋一系列火鍋配料、點心、小菜，如花雕酒雞翼、川味燒鮮蠔、燒乳鴿、鐵板鵝肝多士、小籠包、蝦餃等，款式多元化。有網民更提大家記住食海燕窩椰汁燉木瓜，用半個木瓜盛載，足料又滋潤，榴槤炸彈就啱晒榴槤控呀～

【本月熱門】型格餐廳酒吧 The Pearl   

圖：siuvia

呢間走暗黑系裝潢嘅型格餐廳，位於尖沙咀一間酒店內，陳設帶藝術感，又有戶外平台座位，適合同朋友嚟chill吓。供應嘅fusion菜式有創意，好似「和風原隻磯煮鮑魚配野菌意大利飯」味道平衡得幾好，鮑魚口感軟腍，飯亦有菇菌香氣；如果簡單飲返杯配份小食，酸爽開胃嘅「秘魯吞牙魚拌番茄莎莎配香烤鱈魚脆片及黑醋汁」係唔錯嘅選擇。另外打卡雞尾酒不妨試Pearadise，用中式髮釵穿起乾梨片，口感清爽容易入口，當作餐前酒都得。

文：Cathy