呢幾日熱到一個點，落一落街行兩步都好似就嚟溶咁，係會特別想食雪糕嘅（係，又搵藉口）。啱晒，Movenpick開咗間官方專門店，唔淨止有16款口味嘅雪糕揀，仲有milk shake同甜品！

呢間開喺觀塘超巿入面嘅舖頭，係官方嘅第一間專門店，menu上有5款甜品3款咖啡2款奶昔同16款口味嘅雪糕，有部分口味更加係得專門店先有得食，平時一杯杯嗰啲冇㗎！

最吸引一定係三重奇幻杯，喺脆脆窩夫上面放多3大球雪糕，仲要可以自選口味嘅添，啱晒貪心鬼。好似開飯仔呢杯咁，就揀咗法式焦糖燉蛋、意大利奶凍同藍莓芝士蛋糕味。餅底幾脆，由店員每日自家製㗎。

三球太多嘅話，一球雪糕窩夫都係一個choice。不過此窩夫不同彼窩夫，奇幻杯嗰隻係薄脆，呢隻係格仔餅形，相對軟身啲，再喺面頭淋上朱古力醬！配特濃咖啡味嘅雪糕都幾夾，咖啡味夠香呀，平衡返朱古力醬嘅甜。

唔好睇少呢杯milk shake，真‧真材實料，冇加冰冇加糖，單純用三球雪糕再加奶去整，飲落口感好rich！朱古力控飲到杯瑞士朱古力奶昔應該會好開心，濃濃der甜甜der。至於士多啤梨奶昔酸酸甜甜咁，仲可以咬到一粒粒果肉，同樣開心。

而雪糕就有單球或雙球、杯裝或甜筒裝揀，夏天幾啱食啲fresh啲嘅口味，推介酸酸地嘅檸檬青檸雪葩同熱情果香芒雪葩！

Mövenpick
地址：觀塘觀塘道418號創紀之城五期apm LG層一田超級市場

文、相：Kar