旺角通菜街向來係一條低調嘅平民食街，最近新開一間充滿中式味道嘅食店，賣嘅卻係fusion味濃嘅Soto Ayam湯麵，咦，但係又灸燒又雞叉燒咁新派嘅？開飯仔即刻了解下！

Soto Ayam湯麵，即係印尼嘅經典麵食，喺當地非常普遍，好似我哋嘅雲吞麵。後來東南亞國家發展出不同版本嘅Soto Ayam湯麵。而老闆Tina獲得喺印尼生活多年嘅婆婆傳授Soto Ayam嘅湯底家傳秘方，再將湯麵、食材大upgrade，並用新派煮法處理，聽落仲唔係一碗fusion湯麵？

湯底分雞湯、牛湯兩款。（左）雞湯係用體型較大嘅龍崗雞，連埋番茄、石栗、香茅等10幾款香料一同煮，滾起後熄火並將雞隻浸約20-30分鐘，讓雞汁精華流入湯底中，亦令雞肉更加入味。然後拎起雞隻，起骨備用，再將雞骨放入湯中熬煮2-3個鐘頭。每次一煲都放入最少60個雞一齊煲，令湯底好濃；而（右）牛湯係用牛腩、牛骨，加埋南薑、檸檬葉、黃薑等10幾款香料一同熬煮超過6-8個鐘頭而成。

呢碗雞味十足嘅灸燒手撕雞湯陽春麵($56)，以雞湯去煮麵條，然後將雞肉撕成雞絲，加入雞湯形成嘅厚厚雞油，再以火鎗灸燒，最後將椰菜、雞肉、炸蒜、腸粉粒、溏心蛋及蔥花依次加入湯麵之中，搞掂！

餐廳建議，第一啖先品嚐湯底原味，然後可再按個人口味加入檸檬、甜豉油提升味道，嗜辣之人更可品嚐擺放喺枱上嘅自家製十三姨辣椒醬。

湯底無想像中咁油膩，相反仲幾清香，味濃而不過鹹，而且無加味精，飲落舒服；用雞湯煮成嘅麵條好入味，口感有啲似烏冬，夠滑溜。除咗陽春麵，客人更可選米粉、粉絲、銀針粉或者四蔬（即以當日供應嘅4款蔬菜代替粉麵）。

經灸燒過嘅手撕雞好香口，有啲位更有少許焦脆感，層次豐富。另一亮點在於湯麵中居然有腸粉粒，既有咬口，又可吸湯，好juicy。

另一道以雞湯做base嘅（左）灸燒雞叉燒湯米粉($60)，乜嘢係雞叉燒？大廚將雞髀肉卷成圓筒狀，然後以日式叉燒方法處理，將雞叉燒以65度慢煮1個鐘頭而成，雞肉依然好嫩滑。而（右）金牌牛腩湯銀針粉($63)配搭新穎，銀針粉長短不一，口感特別，而且好滑溜，與濃郁嘅牛湯好夾。

開業約一個月，最受歡迎嘅係呢碗十三飛($69)，一碗可以飲牛湯、食牛肉、嚼牛腩。配料有安格斯牛肉、加拿大牛腩、無激素嘅日本新紀元溏心蛋及粉絲拼米粉，用料靚，而且好豐富。

另外，餐廳供應滋味非常嘅各款串燒，有雞翼、雞腎、雞軟骨、雞腿肉及豬頸肉5款。串燒上面灑咗由辣粉、燒烤粉、孜然粉而調成嘅自家串燒粉，而辣度亦設走辣、小辣、OK辣、辣到笑4種程度選擇。開飯仔鍾意雞軟骨串燒，香而不辣，而且又有口感，價錢為$13/串。

餐廳特別訂造自動串燒機，插上食物嘅串燒放上串燒爐後會自動旋轉，食物受熱更加平均，亦易熟啲。而且串燒機不太有油煙，食起嚟更加健康。

飲品方面，餐廳供廳黑牛、白牛等經典飲品，仲有較為少見嘅（左）金牛，入面有芒果雪糕、忌廉、oreo粉及朱古力條，價錢為$26。而另一經典飲品（右）鮮奶溝忌廉，餐廳會喺上枱時將鮮奶及忌廉汽水交畀客人，由客人自行溝出心水比例。

灰色嘅凹凸磚牆、高掛嘅紅燈籠、木系嘅鏤空擺設、線條簡單嘅中式畫等等，裝潢營造出摩登嘅中式風格。

十三姨
地址：旺角通菜街1M-1T號華發大廈地下C號舖

文：Joy