咁多位孝順仔孝順女，就嚟又到母親節喇，係時候要開始plan下買咩禮物、去邊度食大餐同埋點慶祝喇。今年有啲新款嘅蛋糕，應該可以一次過滿足晒外貌協會同內涵協會嘅成員，做個巡禮畀大家參考下，邊款最啱你媽媽啦。

致：抹茶控媽媽     Tokyo Milk Cheese Factory

如果媽媽同你一樣，都係抹茶嘅超級粉絲，呢個全新配方嘅抹茶芝士餅就啱晒喇。抹茶濃度加到成200%啊，回甘度幾高，而且抹茶味夠晒香濃，加埋下層嘅北海道牛奶慕斯，帶出返啲甜味，係nice嘅。

致：細食媽媽   Twinkle Baker Decor

對於唔太好甜或者比較細食嘅媽媽嚟講，下下原個蛋糕咁又真係未必消化到，不如考慮下Cupcake，細細杯，的的式式都幾好。其中呢間cupcake店，一向都多多搞作，有唔同港式茶記飲品系列，而家仲加入埋糖水系列嘅全新口味，包括芝麻糊、杏仁露等，又幾有新鮮感。BTW，佢哋都有原個造型嘅cake嘅，好似車厘子芝士蛋糕咁，酸酸甜甜，又有脆片內餡，口感唔錯，重點係個look紅卜卜又夠高雅，好鬼靚。

致：貪靚媽媽    Vive Cake Boutique

至於貪靚嘅媽媽，梗係要揀返啲靚靚蛋糕嚟氹佢哋啦。玫瑰蛋糕由粉紅色、馬卡龍、玫瑰花等組合而成，集齊晒女人最愛最冧嘅元素。不過都唔係淨係得個樣，裡面嘅玫瑰海綿蛋糕夾住甜甜der白桃慕絲再夾埋香檳啫喱，一啖幾個層次。另一款cake，蘿蔔奶油忌廉芝士蛋糕就啱晒注重健康嘅媽咪喇。

致：愛花媽媽  帝京餅店

對於好鍾意收花嘅媽媽，應該都會好鍾意呢款花花蛋糕。用上韓式嘅唧花技術，唧出一朵朵玫瑰花喺蛋糕面，係冧豬嘅。蛋糕嘅味道亦好豐富，有士多啤梨果肉喺中間，又有用燕窩製嘅牛奶布甸粒，同埋櫻花味嘅白豆蓉忌廉，呢個母親節實快樂。
註：5月1日起發售

致：高貴媽媽 東海堂

如果媽媽怕cheesecake太heavy，而平時又食得太多鮮果忌廉蛋糕嘅話，可以考慮下絲絨蛋糕，佢嘅質感散發住一種高貴嘅氣質，紅色紅菜頭朱古力味或者紫色嘅藍莓芝士，都應該係媽媽嘅心頭好之味。

文：Kar