第8屆樂活博覽及第5屆亞洲素食展今日展開，以天然、有機、綠色生活同素食產品為主，多達百間本地及海外知名品牌，帶嚟超過4,000種展品！特設「體驗健康素食樂」公眾專區，一連三日開放入場參與，等開飯仔幫大家睇睇有咩特色產品同活動啦！
 

有見香港素食者同注意素食嘅人多咗，今年亞洲素食展開放公眾區，提供一站式素食及健康生活體驗。有多間嚟自唔同國家嘅展商展示無麩質、純素食品等，同場亦會舉辦一系列活動，包括由五星級酒店總廚及多位素食KOL示範嘅「素食廚房」、選擇多元化嘅「綠色生活DIY工作坊」，同健康專家及素食達人分享。
 

即買即食健康推介

雙重朱古力曲奇無奶雪糕（$30/杯）

主打無奶純素雪糕嘅Happy Cow特別推出會場限定嘅雙重朱古力口味！朱古力香味加上曲奇碎，口感豐富又唔會太甜。雪糕不含牛奶、蛋製品、麩質、色素、防腐劑或膽固醇，而且係低糖配方及香港製造。另外仲有薑、薄荷朱古力碎、椰子、鹽味焦糖，同芒果共六款口味。

攤位：快樂牛有限公司（H22）
 

乳酪炸米餅（$15/3件）

1981年開業，位於尖沙咀嘅活蘭印度素食亦喺會場售賣小食，好似乳酪炸米餅、咖喱角、蕃茄洋蔥炸米粒等等，行到餓嘅話可以即時醫肚喇。

攤位：Veg Concept Ltd.（N07）
 

有機子薑軟糖（$50/2包，$100/5包）

口痕想食零食都有健康選擇，細細包方便擺喺Office隨時食！有中辣同特辣兩款口味選擇，都係選用子薑芯比較嫩嘅部分製作，口感軟得嚟又帶少少煙韌。

攤位：Lively Life Company（N17）
 

有機純素朱古力（$28/70g）

保加利亞出產有機純素朱古力，而且無精製糖及加入Superfood，好似70%黑朱古力加咗奇亞籽同西柚，75%黑朱古力加咗生可可碎仁，植物奶朱古力就有白桑梅同烤杏仁。

攤位：甘薯葉素食超市（K02,K04）
 

Oatly純素燕麥奶（$27-32/盒 1L）

用瑞典優質燕麥製成，100%純素、不含乳糖或豆奶成份，蘊含可溶性膳食纖維及蛋白質。有原味、有機、朱古力同咖啡師燕麥奶共四款選擇，咖啡師燕麥奶特別在可以打發奶泡同拉花。喺會場買兩盒或三盒1L裝仲送一包細Size嘅，大盒買返屋企慢慢嘆，細包裝可以即時飲吖嘛。

攤位：甘薯葉素食超市（K02,K04）
 

活性有機抗氧化健康飲品（$24/包，$100/5包）

有歐盟有機認證，0g脂肪而且用上龍舌蘭蜜，有糖尿病嘅亦可以享用。不含麩質及加入藜麥粉，最啱注重健康嘅朋友。

攤位：瑞典行有限公司（M01）
 

德國白帝修道院小麥啤、德國彩虹手工啤（罐裝$15/罐，$20/2罐；支裝$20/支，$50/3支）

素食亦有酒類選擇！左邊兩款係無酒精成分，邊行邊飲都無問題呀。右二Tap 4更加用有機小麥釀製，帶柚子同蘋果香。右三係德國白帝修道院小麥黑啤，帶少少焦糖香同酒花苦味。

攤位：富通(香港)天然食品有限公司（K17,K19）
 

以色列全素葡萄酒（$148-$198/支）

因為部分葡萄酒會加入魚膠或蛋白等作為澄清劑，所以並唔一定適合對動物蛋白敏感嘅人士，所以近年多咗全素葡萄酒。 呢度有多款無使用農藥化肥嘅有機全素葡萄酒選擇，而且細心標明最適合嘅食物配搭，最啱鍾意喺屋企下廚兼飲返杯嘅朋友。

攤位：百利行控股有限公司（K07）
 

天然花瓣醋（$88/支 600mL）

果醋大家可能都試過，呢款嚟自台灣嘅花瓣醋又試過未？用蘋果醋為基底，加入花瓣浸3至6個月，加水飲或者整甜品都得。而且有唔同功效，好似大馬士革玫瑰有助美白淡斑，桂林桂花有助明目清肝，普羅旺斯薰衣草呢就可以消炎寧神！

攤位：百利行控股有限公司（K07）
 

入廚最啱素食選擇

本地農場新鮮蔬果

素食展一角係本地農場專區，共有六間香港農場售賣自己出產嘅新鮮蔬菜同水果，例如呢間就有少見嘅白、綠、紫三種顏色嘅椰菜花，紫色椰菜花更含豐富花青素，對心血管同眼都有好處。

攤位：有心機（N20）
 

有機即沖蕎麥片（特價$10/包）

早餐健康之選！烏克蘭出產，當一般即沖麥片咁沖奶就食得，含豐富膳食纖維，有助通血管同降血壓。而且會場特價$10包，買包畀屋企長輩試下都唔錯。

攤位：小苗子（M09） 
 

glee天然水果茶（$45/盒，$108/3盒）

可以熱泡或者冷泡，無添加蜜糖而係用水果嘅天然甜味帶出茶香，而且水果乾泡茶後亦可以食用！有草莓乳酪、菠蘿蘋果、石榴甜橙同藍莓雜錦共四款口味，前兩款較Fruity亦較易入口。

攤位：新生精神康復會（M20）
 

（左）CHAYA無麩質純素卡邦尼醬（$40/盒），（右）小田生麵無麩質麵條（$21/包）

對麩質敏感或者有乳糖不耐症嘅朋友，喺屋企都食到無麩質卡邦尼意粉啦！無論卡邦尼醬定麵條都係無麩質純素產品，卡邦尼醬以豆漿、椰奶為基底，低卡路里而且用0升糖指數嘅甜菊糖。麵條有用糙米粉製作嘅意大利粉、糙米製作嘅細扁意粉，同用白米製作嘅拉麵，全部無麩質同不含27種過敏原材料。

攤位：旺利亞洲有限公司（L10）
 

（左）Truffle Zest（$150/50g），（右）Black Truffle PATE（$108/90g）

煮素食怕味道單調？加少少松露調味就完全唔同！呢度專賣意大利松露調味料，全部不含麩質、不經基因改造、不含味精嘅純素食品。Truffle Zest係黑松露調味粉，，而Black Truffle PATE就有8%黑松露同10%牛肝菌，菇菌香非常濃郁！

攤位：Sabatino Hong Kong Ltd.（L07） 
 

（上）純素芝士醬（煙熏香辣）（$70），（下）純素芝士醬（原味）（$70）

想惹味加純素芝士一樣得，呢款手作芝士醬係用發酵腰果模擬芝士香味，再打成醬，無論點嚟食定整嘢食都一樣方便。無麩質、無牛奶、無雞蛋、無大豆成分。

攤位：營樂股份有限公司（K10）
 

（左）畫眉草（苔麩）雙重巧克力窩夫/班戟預拌粉（$125），（右）無麩質鬆脆撻皮預拌粉（$50）

想整純素無麩質甜品一樣無問題，呢兩款預拌粉都係無麩質、無牛奶、無雞蛋、無大豆成分，方便易整。

攤位：營樂股份有限公司（K10）
 

Artisan Raw New Zealand Honey（$110-$160/樽）

Raw Honey即係無經過高溫消毒同過度處理嘅原生蜂蜜，可以保留更多維他命、礦物質等營養。而且有黑加侖、薰衣草、麥盧卡等唔同種類，可以按自己口味同需要嘅營養選擇適合自己嘅蜂蜜。

攤位：Peacock Fine Foods & Peacock Belgian Chocolates（N05）
 

同場亦有超過50場精彩活動，包括「素食廚房」、「綠色健康工作坊」、健康及素食達人分享，詳情可瀏覽展會網站及Facebook專頁。

樂活博覽∣亞洲素食展 2019

地址：灣仔博覽道1號香港會議展覽中心展覽廳 5F 及 5G

入場詳情：
2019年2月22至23日（星期五至六）：
10:30-19:30憑票*可免費參觀亞洲素食展公眾區 
2019年2月24日（星期日）：
11:00-20:00樂活博覽及亞洲素食展同時開放，入場費為港幣20元*
*12歲以下小童及65歲或以上長者無須購票免費入場

文、相、片：Cathy