滑溜香濃嘅雞蛋配上惹味嘅醬汁同白飯，簡直就係最和諧嘅配搭。蛋包飯可以話係日本其中一樣具代表性嘅美食之一，喺香港除咗可以食到日式餐廳嘅正宗口味，仲有唔少fusion餐廳同茶記都有供應，一齊嚟睇睇有咩唔同～

目錄

東京老字號蛋包飯 グリル滿天星 

圖: 100胃

來自東京、1978年已經開業嘅蛋包飯專門店，糅合日法烹調方式製作和洋料理，上年終於登陸香港，仲有香港限定口味添～滑蛋選用蘭王蛋製作，鮮色又重蛋味。飯底有3款，分別係炒焗飯、番茄飯及咖喱飯，選用本米連同竹筍、洋蔥、粟米、香菇等8種食材，一齊放入秘製雞湯中先煮後烤焗，本身已經好夠味，配上唔同嘅醬汁又更豐富。香港限定蒲燒鰻魚蛋包飯，鰻魚超大條，鰻魚汁鹹淡適中，唔會好似坊間嗰啲太甜而蓋過其他食材味道。

灣仔超人氣店 貓之眼 

圖: Thybesals

灣仔街坊或者附近返工嘅人士應該對呢間鋪唔陌生啦～由日本人主理嘅人氣蛋包飯專門店，招牌三色蛋包飯一份有齊兩個口味，分別係咖喱豬肉+濃茄牛肉，咖喱飯甜甜地，濃茄牛肉番茄超濃而且牛肉炆得好腍。漢堡扒配醬汁蛋包飯都好推介，和牛漢堡扒非常厚身，入口肉汁豐富充滿牛味，配埋燴牛肉汁送飯一流～

韓式烤肉流心蛋包飯 Banchan and Cook   

圖: vanessafoodiary

唔係淨係日式餐廳先有出色蛋包飯！呢間韓國餐廳一樣咁高質， 烤牛肉蛋包飯上菜時已經見到佢好有彈性咁，一切開蛋皮入面啲蛋漿好似熔岩咁流出嚟，超滑溜同時蛋香十足，帶一點點牛油香！甜甜嘅韓式牛肉配埋番茄炒飯底，無得輸呀。另外仲有其他蛋包飯都好值得一試，如明太子慢煮雞肉同泡菜燉五花肉等。

地道咖喱蛋包飯 華記士多

圖: Wildchildcarol

西灣河一間地道茶記竟然有蛋包飯食？你冇睇錯呀，唔單止有得食，網上仲有唔少人吹捧添。佢就只供應兩款咖喱蛋包飯，一款原味，另一款就加咗芝士，咖喱汁食落濃郁，蛋都好滑，飯底係雞粒炒飯，粒粒分明，而且份量又多性價比都幾高。

元朗抵食外賣店 風之谷蛋包飯 

圖: yuchiro

元朗新開嘅外賣店，旋風蛋包飯可以話最受歡迎。推薦黑松露雜菌蛋包飯，一開盒就好香，蛋混咗黑松露醬，雜菌亦用黑松露醬炒過，滿滿都係黑松露香氣！燒汁肥牛蛋包飯都幾高質，飯底有用燒汁煮過，肥牛亦有用蒜蓉炒香，誠意滿分。

文: Yanica