一講到千層蛋糕，大家腦海中一定會聯想到連鎖嘅千層蛋糕名店～不過隨住千層蛋糕愈來愈流行，已經愈來愈多小店同網店崛起，而且仲愈來愈多口味同變化，除咗常見嘅抺茶、伯爵茶等，到而家連流心都有。今次就精選咗幾間舖畀大家，要特色有特色、要平有平。
選用日本時令食材 Kazuki Bakery
主打每日新鮮即製、日本直送材料同特色創意口味嘅蛋糕店～特意喺日本搜羅並選用當季高質時令食材，所以好多配搭都充滿驚喜。如丸久小山園抺茶x濃厚日本黑芝麻千層蛋糕，香濃嘅黑芝麻同帶甘味嘅抺茶好夾，另外仲有台灣芋頭芝士千層同法國栗子x日本焙茶千層等。特別一提佢哋抹茶產品均採用丸久小山園高級抹茶青嵐製作，比起一般抺茶更濃厚，茶甘味更突出。
圖: 蜂蜜豆腐千層 師妹甜品
估唔到長洲都有出色嘅千層蛋糕！招牌芒果千層蛋糕餅皮好軟熟，而且芒果嘅份量好多，每一啖都食到芒果肉，配滑軟滑嘅忌廉一啲都唔覺得膩。仲供應坊間超少見嘅蜂蜜豆腐口味，帶淡淡豆腐味，蜂蜜啫喱放喺隔離可以自行決定甜度，啱晒唔太好甜嘅朋友。
圖: 斑蘭椰子千層 Shaz Confections
由新加坡人開設嘅千層蛋糕品牌，贏就贏在口味特別而且好有新加坡特色！全部都係人手製作，每日數量有限～店舖嘅千層蛋糕同坊間唔同嘅係會加入蛋糕底，口感層次豐富啲之餘仲無咁易膩。人氣斑蘭椰子千層蛋糕，班蘭嘅清香亦食得到椰子嘅甜味，味道好平衡；玫瑰荔枝千層蛋糕都好清香，而且啱晒相機食先呀！
圖: 平價貓山王千層pancake 沛公甜品
喺千層蛋糕未興起前已經有賣千層pancake嘅甜品舖！必試當然係D24榴槤千層蛋糕，20層餅皮，配上cream同滿滿嘅榴槤肉，榴槤控必試～另外仲有芒果千層、法國栗子千層、宇治金時千層及石板街千層等，而且比起坊間嘅千層蛋糕價錢平啲，純粹想平平地食到件嚟過下口癮，質素要求唔太高嘅可以揀佢。
圖: 油麻地美斯
30層超薄餅皮 Tiffanys community bakery
一間非牟利嘅蛋糕網店，店主Tiffany係一位積極樂觀嘅女孩，雖然身體上有障礙，但仍然勇敢地追求同實踐開設蛋糕店嘅夢想，希望透過佢嘅甜品散播正能量。佢哋嘅千層蛋糕足足有30層，每塊餅皮都薄到透光，食落唔會太感受到餅皮嘅存在，入口即溶，而且蛋糕上會有一層奶凍，好有特色～推介茶類口味，因為茶香好突出，另外仲有芒果千層、紫薯千層同黑芝麻千層等，仲有得揀流心添！
圖: 官方instagram
文: Yanica