話咁快又一個月，回顧返上個月有唔少新上榜餐廳，8月份可以用人氣反彈嚟形容！竟然有好幾間舊餐廳，不約而同再次打返入十強，所以話雖然飲食潮流來得快去得快，新餐廳固然吸引，但要站得住腳都要靠實力同埋穩定水準嚟保持人氣。唔講咁多，立即倒數！
第10位 湯•米 (*新上榜)
今個星期繼續有台式臭臭鍋專門店，選用蔡瀾都推薦過嘅臭豆腐店出品，加上台式鴨血、米血糕、貢丸等配料，連湯底沙茶醬都係台灣入口！另亦有沙茶牛肉鍋、巴蜀烤魚鍋等好多選擇。飲品當然唔少得大熱嘅芝士奶蓋茶同水果茶，一站滿足晒幾個願望。
圖：第9位 茶屋町
今個月無起跌嘅日式定食及甜品店，繼續佔據第9位。食物以列車便當為靈感，難得抵食得來有水準，平均消費大約七八十蚊，賣相亦靚，連飲品都係日本入口貨。值得一提係門面裝修似日式傳統建築，而舖頭入面就似列車車廂，好有心思。
圖：第8位 芝樂坊餐廳
一開張時瘋魔全城，估唔到開業一年後再重返十強榜！餐廳曾喺港島開pop-up，又大搞半價優惠，而且而家冇當初排得咁癲，令未有機會試嘅人都終於食到。溫馨提示下午茶同Happy Hour時間去幫襯，又或者5pm前訂定枱，就唔使等得咁辛苦啦。
圖：第7位 渝味曉宇重慶老火鍋
麻辣火鍋長開長有，呢間《舌尖上的中國》介紹過嘅火鍋店，同時亦係重慶50大火鍋品牌排名第一，開業一段時間人氣仍然不減！內臟如牛肝、毛肚、黃喉等配料夠新鮮，索埋麻辣湯好惹味，亦有重慶耗兒魚、苕粉、燕餃同現炸豆皮等少有啲食材。天氣開始涼又可以開始打喇！
圖：第6位 第一郡 (*新上榜)
呢間越南小店由越南夫妻檔開設，雖然冇名人加持，但就以樸實無華而且價錢公道嘅地道越南菜式，成功取得街坊歡心，深水埗同天后各有分店。越南牛河同蕃茄蟹膏湯檬以外，亦有包住蕉葉嘅米紙卷、斑蘭綠豆糕等好少有菜式。
圖：第5位 響 - Hibiki 日本燒肉 (*新上榜)
日本燒肉加放題，兩種最受歡迎嘅菜系結合又點會唔hit？呢間餐廳食材都唔錯，刺身有海膽、帶子等，有澳洲和牛、米澤三元豚，海鮮就有細條喜之次、生蠔同鮑魚等，甜品就有Mövenpick雪糕。當然價錢貴少少，但一分錢一分貨，值得嘅。
圖：步菲、imeatstock
第4位 粒粒果甜品 (*新上榜)
近年甜品唔係抹茶、班戟就係芋圓，好耐都冇食過新嘅港式甜品，呢間甜品店新開冇耐就登上第4位，因為有啲新意，好似係成粒波子咁嘅水果星球，晶瑩剔透。仲有萌斷面果汁，影IG就最適合，仲有牛奶小方、花形窩夫，好有新鮮感呀！
圖：第3位 海南雞公主(*新上榜)
無論係新加坡定係泰式海南雞飯都有好多捧場客，店主係半個泰國人，仲請來泰國師傳炮製，海南雞有濃郁雞味，雞皮之間仲有層啫喱膏，食落更香更滑，麵豉醬夠濃夠酸香。雞飯放入便當盒入面，連沙律同甜品，做得精緻。豬手飯、咖喱都有水準，唯一缺點就係冇乜堂食位。
圖：第2位 Teru Teru Bōzu (*新上榜)
呢間日本餐廳真係夠晒新，由日籍師傅主理，唔係壽司拉麵，反而主打關西風摩登料理。特別菜式木盒蒸籠飯，用上大量蔬菜、海鮮等一齊蒸熟，保持食物原汁原味。亦有大量送酒小吃，網燒和牛、冷意粉等，幾有新鮮感。
圖：第1位 FLIPPER’S
開業一年，三度打入十強榜，估唔到再次榮登榜首！始終梳乎里班戟不死，早排餐廳推出宇治抹茶班戟，成功再吸引人回流幫襯！之前趁白桃當造又有期間限定口味。好快就有強勁競爭對手，相信要保持優勢都有一定難度。
圖：文：Perrins
