聞說喺唔開心嘅時候食下嘢飲下嘢，係有助調劑下心情，咁食咩好？食「塵」啦！講緊嘅係本地人氣插畫DustyKid小塵呀！唔好睇少呢粒塵，由2012年開始，一直以文字同漫畫治癒咗唔少人。最近，佢仲進軍飲食界，喺上環開咗間茶飲輕食店，希望可以為香港人打打氣！

「喺一啲好艱難嘅時刻，笑聲好重要。」DustyKid插畫師「塵爸」Rap最初畫塵只係諗住用嚟紀錄自己當刻嘅心情，後嚟就透過網絡同書籍去成為大家嘅「心靈雞湯」，但佢慢慢發現書嘅門檻都係比較高，未必可以輕易接觸到所有人；而且當大家唔開心嘅時候，都會買嘢食同買嘢飲去氹自己，於是就想將DustyKid嘅治癒力層面擴闊，「當你唔開心，就將塵嘅食物放入口，帶嚟治癒力，我哋啲嘢飲、包裝上面全部都有啲金句。」

「眼淚願意為你抹去一切哀愁」、「期待的時光也可以很享受呢」……舖頭主打曲奇、蛋糕同brownie三款烘焙輕食同埋手搖茶飲，每件小食嘅包裝上都有句打氣金句呢！曲奇總共有6款口味，包括抹茶、抹茶燕麥、咖啡等，其中抹茶口味用上日本小山園區嘅抹茶粉製作，難怪食落有淡淡甘香。想要治癒感再強啲嘅，就揀塊大面塵曲奇啦，大大粒塵樣，夠晒可愛。

伯爵茶牛油蛋糕則係Rap嘅私心推介，口感鬆化。而且喺製作時加入伯爵茶葉，無論聞定係食，都有陣陣茶香。

 北海道牛乳合桃布朗尼

小店仲有火龍果、西柚同菠蘿等天然果乾，幾款都係酸酸甜甜口味嘅生果，好refresh下。特別係西柚嗰款，酸得嚟仲有少少澀，係平時比較少機會食到嘅果乾呢。btw，呢啲果乾除咗可以即開即食，仲可以放埋茶包變做果茶！

茶飲方面，以有甜、酸、苦、辣為主題，就如人生一樣，各有滋味。Rap建議大家可以根據當日嘅心情，去揀返一杯對應嘅茶飲。甜甜der黑糖珍珠港式奶茶，以手搖港式奶茶做茶底，就算你飲過幾多杯其他嘅珍奶都好啦，呢杯係額外有多份香港先獨有嘅奶香茶濃味道。

酸溜溜嘅話有「爆檸梳打」，呢杯犀利喇，一聽佢落咗咩生果落去，就知道將會酸到震！4種酸界代表包括檸檬啦、青檸啦、西柚啦同埋橙，4款生果由店員人手逐下逐下「盅」落去，仲要唔加糖喎，酸度十足，但又好鬼過癮。

至於苦嗰杯呢，就未必人人接受到喇。如果你見到青綠色就以為係抹茶嘢嘅話，少年你太年輕，需知道苦瓜、西芹同青瓜同樣都係青綠色㗎！呢杯回甘度極高，草青味強烈嘅仙草三青茉莉茶，正正就係用呢3款蔬果製作，另外加入仙草喺底，增加口感。

 辣：桂圓夠薑梳打

特別推介期間限定嘅茶王同茶后，兩款都係選用台灣南投縣嘅茶葉，經過18個鐘浸泡而成嘅冷泡茶嚟，前者係茶味香濃嘅鐵觀音，後者則係回甘中帶白桃甜香嘅白桃烏龍。

心事如塵茶食亭
地址：上環皇后大道中255號曼哈頓大廈地下G01B號舖

文、相、片：Kar