Wine & Dine 2017現場直擊靚酒美食速報

建行（亞洲）香港美酒佳餚巡禮（Hong Kong Wine & Dine Festival）今日正式開鑼啦！OpenRice係大會網上媒體夥伴，一早已經去到會場為大家作第一身直擊報導！事不宜遲，立即update吓今年嘅情況先。

早前大會公佈原定戶外只可用塑膠杯，不過最新安排係全場無論係戶外或者室內，一律都可以用玻璃酒杯，品酒自然更加好啦！而所有塑膠杯、酒樽、廢紙、廚餘等，都會回收並循環再造，符合環保原則。即使用膠杯飲酒，都可請參展商清洗一下，唔好掉咗佢用第二隻咁浪費呀。

主舞台呢邊，會有世界調酒師冠軍做花式調酒表演。

好，立即帶大家行返個圈先。今年總共有400個攤位，同去年相約，美酒佔300個，其餘就係美食攤位。五大美酒展區，包括新增嘅Robert Parker Wine Advocate Pavilion及氣泡盛薈，另亦有國家展區、尊尚美酒區及專業交流地帶。美食展區就新增「拍住賞」食飽里，同埋一向好受歡迎嘅酒店美饌。

飲酒前不如食定嘢打個底先，一入到「拍住賞」食飽里，就有一張電子消費卡，食勻晒最後先至埋單，非常方便。

參展餐廳有城中十間人氣食肆，包括由廚魔主理嘅米芝蓮三星餐廳Bo Innovation，仲有法國菜A La Maison XXL、BLUE Butcher、日本南美菜DJAPA及韓國料理Jinjuu等。

攤位：F08 酒鍋 X 禮賓傅

酒鍋同禮賓傅今年聯乘，為WINE & DINE 一同製作4款輕食，有(左)手撕雞肉酥餅、(右)蟹皇海鮮酥餅及(下)酒醉安格斯柳粒。

一手可以食牛柳粒兼飲嘢解渴，非常方便。

較有特色嘅係呢個酒鍋燙，客人可從沙嗲、麻辣、黑松露雜菌等醬料揀選一款，並選擇想食牛肉/羊肉串，就可以食到一杯五串嘅酒鍋燙，當中仲有隻造型好cute嘅雞仔串添！

攤位：F10 Bo Innovation X Bib n Hops

由「廚魔」梁經倫主理嘅新派分子料理餐廳亦供應4款美食，分別有：分子小籠包($50/1件、$80/2件)、上海蔥油餅雞蛋仔($50/份、$80/2份)、烤牛肉牛油果莎莎漢堡($120)及韓式迷你拌飯($80)。

分子小籠包造型非常特別，勁「蛋黃」。

蔥油餅雞蛋仔，究竟係咩味？雞蛋仔好有蔥香，而且睇真啲，雞蛋仔入面都有幾多蔥粒喎！

配搭呢支來自澳洲嘅Chalk Hill Vermentino白酒口感更佳，喺Wine Australia區都有得賣架！

烤牛肉牛油果莎莎漢堡、韓式迷你拌飯都係飽肚之選。

攤位：F02 JINJUU

左起：秘制香辣泡菜冷麵(無湯)($80)、韓式辣醬雞翼($50)、醬燒牛肉(無骨)($150)、抹茶柚子提拉米蘇($50)。

攤位：F03 PORTERHOUSE

Porterhouse供應有香辣豚肉漢堡($80)、極濃芝士通心粉($100)、清新藜麥沙律($50)以及牛肋條($50) 4款小食。將熱得半融嘅芝士淋落通心粉上面，視覺效果一流，食落又夠「芝」味！

清新藜麥沙律，味道清新。

攤位：F09 Cassio

西班牙菜餐廳Cassio就製作分量細嘅主食，有(左)加泰羅尼亞式肉丸($120)、(右)芒果蛋糕($50)、薄切八爪魚配煙燻薯蓉及紅椒油($80)、迷你西班牙辣肉膠熱狗($100)、、及黑松露菌、夏南瓜及西班牙乳酪三文治($80)。

打重點！必試美酒、小食檔！

攤位：C406-C407 SANRIO X LE VIN MIGNON　　　所需品酒券：1

今年SANRIO亦出咗Hello Kitty玫瑰氣酒。酒樽上有個Kitty蝴蝶結，好靚！原價有$328/支，會場而家做$270咋！Kitty迷一定要收藏呀！

除咗Hello Kitty，仲有Little Twin Stars、My Melody！My Melody嗰支係Bordeaux Tradition Rouge 2010 紅酒，配牛肉、羊肉等紅肉就最夾；至於Little Twin Stars嘅係Bordeaux Superieur Blanc 2011，主要配搭海鮮、白肉、芝士及水果。

Hello Kitty公仔亦有現身撐場！

唔好miss咗呢個影相位呀！

攤位：B221 夢幻銀河酒　　　所需品酒券：1

上年好hit嘅星空酒系列，今年再有新成員──橙色銀河酒，味道有啲似桃味，酸酸甜甜。凡試飲橙色銀河酒仲可以免費試食西班牙黑毛豬添！

黑毛豬即切即食，鹹香味十足。

攤位：B409 帝景酒店

帝景今年繼續炮製好多小食，當中最吸引嘅有(左)黑松露芝士烤珍寶菇現香脆帕爾馬火腿($50)、(右)香煎法國鵝肝多士配意大利黑醋汁($50)。

攤位：B408 帝都酒店

至於旁邊嘅姊妹酒店帝都，就以海鮮為主，例如黃金龍蝦鉗。

仲有香煎松葉蟹棒，好有鮮味。

攤位：B407 帝京酒店

唔少得帝京酒店啦，有(左)迷迭香燒羊扒、(右)鹽燒大蝦皇。

金蒜梅酒焗北海道帆立貝，微酸嘅梅酒令帆立貝肉更有鮮味，配埋重口味嘅金蒜，正呀！

韓式炸雞件，快靚正。

攤位：C204-C207 BAILEYS' Ice Cream and Coffee Station　　　所需品酒券：1/2/3

女生鍾意飲嘅Baileys亦有擺booth，想飲Baileys on the Rock，只需品酒券1張就飲到，或者可以用2張品酒券品嚐Baileys Nitro Coffee，,不過開飯仔就推介需要用到3張品酒券嘅Baileys雪糕，先揀夏威夷果仁或曲奇忌廉口味，再揀番心水Baileys口味，有朱古力或咖啡味！

攤位：B613 城市花園酒店

避風塘風味嘅豬手，好想食呀！($80/半隻)

芒薩龍蝦凍($40/件)、桂花珍珠露($30/份)，都幾有特色。

攤位：B338 就是烤菇

大啡菇熱潮依然未退，呢個烤菇店設有5款口味，下面仲有少少薯蓉添，有蒜蓉芝士帶子烤菇配薯蓉($60)、白汁蜆肉薯蓉烤菇($50)等。

齋睇呢個畫面都好想食呀！

攤位：C004 Hitachino HK Trading Limited　　　所需品酒券：5

從日本到港嘅常陸野貓頭鷹手工啤，麥味重兼酒花香。你可以用5張品酒券拎走兩支，或者畀$50，一樣可以帶佢哋番屋企架！

攤位：C202 Heroes　　　所需品酒券：3

場內都有手工啤酒架，呢款Hygge Bros入口甘香，值得一試。

攤位：B610-B611 SKYE天台酒吧及餐廳 / EBB & FLOW 大堂酒廊

呢邊有無得輸嘅甜品──法式薄餅，香脆又多料。設兩款口味，分別為(左)士多啤梨法式薄餅($60)、(右)香蕉曲奇法式薄餅($60)。

松露爆谷($40)，又一新穎小食，松露味幾香！

攤位：C306 酒魂株式會社　　　所需品酒券：3

今年首推嘅山梨縣「七賢」杜ノ奏氣泡清酒，帶有呍呢嗱、楓糖及木桶香，易入口，氣泡亦較為綿密啲，限量1,500支。現場即買為$880/枝，唔知味道係點，不妨用3個品酒券試飲下先啦！

今年新增！生活品味館

新增設嘅生活品味館主要售賣生活用品，例如有Marimekko圍裙、廚具、餐具等。

而門口亦設即場沖製嘅cocktails bar，飲品有(左) Passioned Green Tea，以綠茶、熱情果及vodka 調成；(右) Espresso G&T，用Espresso,gin酒及tonic調成，口味獨特！要注意，品酒券不適用於生活品味館呀！

快速睇！各個酒區之最！

攤位：A706-A707優級波爾多　　所需品酒券：2

今年國家酒區特別新增波爾多展區，有大量優質紅白酒、甜酒首次來港。左邊係Chateau Castagnac嘅Cuvee Raphael，係酒莊主人以兒子命名，酒標上面係一幅可愛漫畫，獲得洛杉磯國際酒評會波爾多金獎。右邊嘅SICHEL易飲亦可以陳年，當地代表極力推介，一個token已可試到。

攤位：G13 Wine's Link Ltd　　所需品酒券：8

至於喺尊尚名酒區，有獲得葡萄酒評家Robert Parker評選為100分嘅紅酒Chateau Pavie，呢支上為2005年最佳波爾多酒之一，口感圓潤豐厚，一支賣$4,280！

而且，今年亦有另一位知名酒評家James Suckling評選嘅頂級佳釀。

攤位：G17-G20 JamesSuckling.com　　所需品酒券：3

三款得到James Suckling評為100分嘅美酒，包括左起智利Clos Apalta Valle de Colchagua 2014、意大利Valdicava Brunello di Montalcino Madoona del Piano Riserva 2010及智利Sena Valle de Aconcagua 2015。