木船 (已結業)

泰國菜是自己愛吃的其中一種菜之一，以酸、辣、咸、甜、苦五味的平衡為特點。用料主要以海鲜、水果、蔬菜为主。Wooden boat 距離太和站約8分鐘路程，方便易搵。入到餐廳，左望右望👀，設計幾靚，枱和天花板都以木材構成，天花板更掛一些粗繩，牆上有2幅船的畫，感覺自己就在海上航行🚢跟朋友坐低，服務員送黎2杯水和menu，望左一陣order左4樣野食脆爆芒果園串燒雞柳泰炒飯泰式鳳爪沙律Combo小食拼盆(小)繼續欣賞木船餐廳設計，同時聽住西洋🎶，覺得自己黎到泰國。沙律先到，接住拼盤，沙律五顏六色，拼盤看上去不錯，共4種食物，有甜蔗蝦，春卷， 魚肉片及魚波波配上泰式甜酸醬，春卷和甜樜蝦外脆內熱，好好味。鳳爪夠爽和酸辣脆爆芒果園和串燒雞柳泰炒飯到，哇味蕾蠢蠢欲動。雞柳肉滑，飯炒得色香味俱備。有芒果糯米磁，焦糖脆爆谷，和粒粒芒果肉粒，好味，食到泰國芒果味，好有滿足感。最後服務方面，欣賞服務員常幫我加水，唔晒我叫。整體而言，木船👍🏻，會再約朋友黎食。

經過太和見到呢間餐廳門口裝修幾有特色於是就入去試下 餐廳裝修幾靚 真係好有木船既感覺 前菜點左青木瓜沙律 口感唔錯 酸酸辣辣 夠晒開胃不過對於兩個人既前菜就有啲多 未必食得晒啊再黎就係小食拼盤 最好食係炸春卷 配埋甜酸醬 好食！ 佢每樣有兩個架 食到一半先記得影 價錢都唔算貴 推介大家黎食下 炒飯點左串燒炒飯 一次過可以試串燒同埋炒飯串燒好香好夠味見到佢既菠蘿炒飯都好吸引架下次黎可以試下呢間餐廳有幾種魚可以選擇 我地就試左冬陰功 條魚上枱果時有火爐係下面燒住 保證熱辣辣冬陰功好夠味 唔算好辣 魚都好滑 唔錯叫左菠椰黎飲 呢個係椰汁沙冰 加埋菠蘿好有夏日感覺 另外泰奶都係好飲 唔會好甜 又好有泰國風味最尾埋單$400幾蚊 食到好飽 下次想食泰國野會再黎！

好耐冇食過泰國野，就同friend黎左呢間木船食飯。呢間餐廳環境好靚，用木黎佈置，襯番木船個名。一開始叫左個青木瓜沙律，味道酸酸甜甜咁，十分開胃。份量都好多，應該夠3個人以上食。跟住叫左個串燒雞柳泰炒飯。呢到嘅炒飯真係好好食，炒飯好香，鹹淡適中入面仲有啲類似豬肉乾嘅肉粒。而雞柳串都好香，仲有沙嗲汁可以點黎食。最後就叫左個酸辣明爐烏頭。雖然叫酸辣，但其實唔係好辣，只有少少辣味，岩晒我呢啲唔係好食得辣嘅人。個湯汁都係酸酸地，好易入口。入面仲有磨菇點綴。而烏頭方面，烏頭肉質鮮甜，魚肉都好多，又唔會好多骨，值得一試。我地都叫左兩杯野飲，一杯係鮮柚子沙冰，另一杯就係叫泰公主。鮮柚子沙冰有好多新鮮柚子果肉，飲品幾甜，唔會好酸。而泰公主就會較酸，入面都有士多啤梨果肉

今晚同朋友黎到哩間泰國餐廳食晚餐，menu咁多選擇之中，最後叫左以下四樣配兩杯特飲～青木瓜沙律（$62）除咗青木瓜之外，仲有紅蘿蔔絲、洋蔥絲同小蕃茄，並用左青檸汁作為調味，食落冇沙律菜嘅草青味，酸酸甜甜非常開胃！Combo小食拼盆（小）（$52）有網紋春卷、泰式魚餅同蝦餅。特別要讚下網紋春卷，春卷外皮炸到好酥脆，食落都唔會太油膩，配埋泰式辣醬，非常好食！串燒雞柳泰炒飯（$78）串燒雞本身已經有用香料燒製，燒完雞肉依然滑嫩，配埋沙嗲醬，鹹甜俱備！而泰炒飯鑊氣十足，裏面配有洋蔥、蛋花、青豆同臘肉，仲有醬汁調味，單單食個飯已經好好食，配埋串燒雞更加滿足🤤👍🏻！冬蔭功明爐烏頭（$138）魚肉一啲都唔腥，而個冬陰公湯底做得非常出色，飲落去酸酸甜甜帶點微辣，令人一啖接一啖，推薦！脆爆芒果園（$58）呢個芒果乳酪沙冰，上層有厚厚的一層cream、芒果粒、popcorn 同芒果雪糕糯米糍等配料，睇落去賣相非常吸引！將cream同沙冰混合一齊飲，飲落似奶昔，非常好飲！夏日芭東海灘（菠椰）（$58）椰子裏邊係椰子沙冰，椰子味濃郁，飲完仲可以挖椰子肉落嚟食～