勝記酒家 (已結業)

今晚放工後同事帶我去灣仔的勝記食晚飯，主推是乳豬的勝記，上到去後見每枱都有叫乳豬，所以我們都點了半隻。乳豬半隻，份量十足，一人食兩三件都已經好飽滯，每件的份量都比我們去飲時大一倍，而且皮脆肉嫩，油脂不多，咸味適中，醮上海鮮醬，乳豬帶點甜味，更好吃。之後再點了其他食物，價錢多數是$70-80起，價錢合理。先點了一個白灼豬肚，豬肚份量十足，又爽又腍，處理得很乾淨，不會有騷味，又以大量的薑葱伴著吃，帶點葱香，下面亦以芽菜墊底，又爽又脆。平時食焗魚腸就多，今次這個家鄉陳皮煎魚腸就真係第一次見，與焗魚腸差不多，不過是拿去煎而非焗，外層蛋醬包著魚腸一起煎，有蛋香同時有魚腸的內臟味，一點也不腥，不過陳皮味就唔多覺。椒鹽白飯魚炸得鬆脆，帶點咸味，不過略嫌粉醬厚了一點，白飯魚望落去份量好似不多，但食落其實都幾飽滯，非常夠食。瑤柱蛋白炒飯份量十足，大既分到有6-7碗，瑤柱碎都幾多，有咸鮮味道，炒飯炒得很爽口，飯粒分明，有陣陣的蛋白及葱香，最後都係食唔哂打包走。店員最後送上桂花糕，充滿淡淡的桂花香味，甜度適中。總結，食物味道中上，價錢合理，服務周到，店員有禮，值得一讚。