夜上海 (已結業)

Yè Shanghai

3.5

189 食记

味道

环境

服务

卫生

抵食

9525

尖沙咀

$201-400

沪菜 (上海) 中菜馆無翅餐廳

103

涼拌海蔘

3 已推介

奧志雷

等级4

2.1K

朋友仔稱工作關係所以要遲一點才到呢，那我先行一步啦。為免要等位或無位，所以一早已訂好檯了。

侍應姐姐帶路，點解不是海景位？依家係無景位，勁失望呀 ﹗又係二人迷你位，迫迫夾夾最憎，您地又當我食只食碟頭飯或每人一碗麵呀？激氣 ﹗而且被幾檯操國語既家庭包圍，有老有嫩有細路，好嘈啊 ﹗幸好不到 15 分鐘就埋單走人，即時回歸寧靜，好采啫。

米芝連上海菜館，我就睇睇您隻米芝連有幾連先！由侍應阿嬏、阿姐、阿哥到後生仔都同樣乎欠周到、欠熱情、欠笑容、欠主動，機械冷冰冰，老闆對您地不好嗎？待遇好差嗎？

夜上海菜色都係包羅萬有，還有很多很多特色菜、自家菜，另我非常好奇，好想全部都試試呢。已經過了約定時間差不多 30 分鐘了，但朋友仔依家在途中，我唯有先 order 前菜及小食，那朋友仔一到就步就有得食啦。

上海泡菜，甜甜又爽爽脆脆，微弱幾乎食不到既辣味而甜味較強，幾得意。燻蛋，煙燻味濃濃而香口，蛋白已被燻得淺啡帶光澤，橙色閃令令蛋黃非常耀眼奪目。室溫糖心蛋黃半溶黏黏軟棉棉，黃味十足又甘甜 ﹗整粒啪入口跟滑彈蛋白混為一體，美味可口呢。

涼拌海蔘，還以為會係麻辣來的，甜酸汁撈上彈滑海蔘片十分醒神醒腦又開胃，配上白飯應該都好好食。醉鵝肝，試試個罕有料埋先，鵝肝勁棉勁滑，跟一般滷水店既硬實鵝肝有著天淵之別。鵝肝散發著咸香，期間夾雜花雕香甜，既有趣又特別，美味可口 ﹗比沙田 18 滷水鵝肝出色多倍，非常不可。

煙燻黃花魚仔，看似微不足度的雜魚菜色居然勁好味勁可口，越食越起勁 ﹗黃花魚肉質嫩滑多汁，外皮燻得油潤，燻得香噴噴，鮮味出眾亦非凡香甜，實在太好食 ﹗

朋友仔太慢喇，遲到 45 分鐘終於到達。見一身性感低胸裝赴會，花姿招展，我就原諒您啦 ﹗前菜、小食及朋友仔都已經到齊，可以起動喇 ﹗順便討論一下主菜食什麼好，朋友仔稱自己食量也不少，都是大食妹一名，可以放心 order 多幾道菜呢。

松茸螺頭燉雞湯，特濃雞湯底，清徹眼底但泛著極濃雞味，湯汁黏黏厚厚的，真材實料無欺場。螺頭海味味道非凡脫俗，佔據整個空間。全部清晒，一滴不漏，好飲到震。

灌湯小籠包，浸在黑醋上半響，讓她稍為降溫就立即完粒掉入口中，大滿足 ﹗勁多湯汁，香甜無比，豬肉味鮮。皮薄餡靚充滿彈性，外皮嚥嚥韌韌較張力不易夾破，如果溫度再熱一點就更加好食。

香煎餃子，good good good ﹗就算普通菜色亦一點都不馬虎，即叫即煎熱騰騰送上。香噴噴氣味直擊大腦，禁不住立即伸手將整隻餃子塞入口中，一咬爆汁 ﹗好好食啊，餃面濕潤嚥韌、餃底煎得金黃香脆，豬肉彈牙又極為甜美，堅好味呢 ﹗發現有雙餃子外皮爛左喎，賣相要扣一點點分喇。

獅子頭，製作複雜、工序繁鎖既上海傳統手功菜。先炸後炆，味道極之香濃，出色地味道剛剛好，不咸不嗆還泛著肉甜味，豬肉鮮味濃厚，配上清甜白菜同吃，如虎添翼。如果能手剁的話，質感就更好啦，依家只食到一粒粒既豬肉鬆，始終較為遜色。

蟹粉釀蟹蓋，非常特別的配搭及烹調，讚 ﹗蛋白熱燙燙混有洋蔥既味道，蟹肉蟹粉跟蛋白已混為一體，嫩滑蛋白佔大部份，不過還能食得出一絲絲甘香蟹粉。味道認真不錯，值得一試，好味道。

龍鬚桂魚絲，驚見功夫菜，梗係即刻 order 試試啦。有頭有尾賣相出眾。魚香處處，勁香噴噴！桂魚絲撈埋木耳絲、甘筍絲、銀芽統統掃落口，配搭得宜，味道混得異常合襯 ﹗多重味道跟口感，滑彈棉爽脆乾濕共冶一爐，滋味非常。

擔擔麵，所有佳餚都已清晒，似乎我都未夠飽呢，食多個麵隱陣喇。麵條有點過腍，彈力不足。湯汁厚厚滑滑，味道偏向清淡，泛著微弱花生醬味，但係完全食唔到香辣味道。唯有使出必殺技，撈上大量 XO 醬，即時好食左 ﹗不過麵質有待改善，要嚥韌彈牙先好食。