新大光燈

营业中

休息中

一盞大光燈，配合一碗巷仔雲吞麵，可能就係60年代香港人嘅共同回憶。雖然未能夠親身經歷一段段歷史，但新大光燈則選擇喺同樣非常有歷史特色嘅南豐紗廠開設分店，希望能夠重現老香港嘅特色。鮮蝦雲吞撈麵首先要講嘅係佢嘅麵底非常大份，如果只叫雲吞麵亦絕對食得飽，不過蠔油就未食到有太大特別！雲吞嚟講算係水準之上，蝦嘅份量亦都比較多，大細適中，作為小型連鎖嘅食肆都可以算係幾大件夾抵食！薑蔥豬潤鮮牛麵講到港式麵食，又點能夠無豬潤同鮮牛？雙拼湯麵份量十足，而且價錢亦都相對經濟。可以一提嘅係豬潤非常嫩滑同埋飽滿，同時亦都保持到好爽身，一啲都唔老。而鮮牛肉亦大大塊，食得出鮮甜味。配埋薑蔥做佐料，成個麵都非常吸引同埋有質感！炸兩雖然新大光燈主打嘅係麵食同粥，但估唔到最令人驚艷嘅並唔係主食，而係貌似平平無奇嘅炸兩！佢嘅炸兩炸得非常脆口之餘亦一啲都唔油膩，即使食咗半個鐘後仍然保持到脆口程度，同埋腸粉皮都幾滑身同煙韌，都可以算係食過之中十分出色嘅炸兩。＊整體嚟講迎新大光燈都算係性價比幾唔錯嘅連鎖麵食店，設計亦都以懷舊港式做主題，舊酒新瓶但絕不遜色。味道 ⭐️⭐️⭐️⭐️服務 ⭐️⭐️⭐️環境 ⭐️⭐️⭐️⭐️性價比 ⭐️⭐️⭐️⭐️

公司附近新開既南豐紗廠，入面有好多間餐廳，都係主打文青路線，但價錢就比較高檔呢。呢間算係比較平價既粥店，裝修都算幾有特色，臨近月尾=糧尾，作為窮人的我Lunch就當然係要平食，所以就同同事黎左呢間食。我就點左個艇仔粥，個粥都算多料既，有魚肉、有魷魚、有蝦，30蚊貨仔，味道算唔錯，都鮮甜的，對得住佢個價啦。因為嫌食粥太淡口，所以我地就點多個炸兩，share黎食，炸兩係即製，入面個油炸鬼好脆，味道就一般。除返開，埋單都是40蚊，平食但質素都唔錯，值得推薦呢。

南豐紗廠成為新一個打卡景點，景區入面有幾間餐廳仔，尼間主打雲吞麵，以及其他小食。4至5點時間，人流都ok，唔駛等位。最低消費每人$25。叫左炸兩($28)，西多士($25)。油炸鬼脆，外層腸粉皮薄，滑滑地，配埋豉油食一流。個人少食炸兩，尼間覺得唔錯，唔油膩，而且油炸鬼大件，有口感。份量夠。西多士最重要係熱辣辣，唔會過"林"，而且仲有d脆香。加埋多牛油多煉奶，正。而且，中間夾住花生醬，仲有少少微粒花生，花生醬亦塗得均勻。整體，環境舒服，炸兩係最多人叫既食物，整得亦唔錯，有水準。