能記飯店

营业中

休息中

喺深井食燒鵝先後試過裕記，陳記，傅記，今次就輪到呢間能記嘞！去到都幾多人，我哋要喺門口等咗一陣先有位，店內唔算大，我哋叫咗： 椒鹽茄子：呢個都幾考功夫，因為茄子係好索油嘅，要攞去炸但又唔想佢吸咁多油真係有啲難度！茄子上枱時賣相都幾得，面頭拍咗啲粉先炸可以吸少啲油，仲有就係切到塊茄子好薄先拎去炸，亦可以減少吸油嘅機會。呢個茄子有啲脆幾香口，椒鹽亦好惹味，味道就唔錯嘞，不過食完都唔似食過嘢，純粹叫嚟睇吓佢點整到唧！ 黃金煎藕餅：上枱時真係幾吸引，一個個金黃色，賣相不俗！面頭粉漿夠薄，蓮藕餅厚度適中，藕味濃郁兼外脆內軟綿，有啲驚喜喎！ 燒鵝：一如以往要咗半隻，因為要等出爐，所以嚟到其他餸都食晒嘞！隻鵝唔算大隻，燒鵝皮因為啱啱出爐又熱又脆，仲要燒得恰到好處有好多肉汁流出嚟！ 肉質唔夠陳記嫩滑稔身不過就唔肥，鵝味亦好濃郁，食得過！ 齋瀨粉：佢個瀨粉夠彈牙又比陳記強喎，仲要浸咗好耐都唔會發漲或者稔晒斷晒，唔錯！ 細枝裝可樂2枝當然最好食仲係陳記啦！