阿元來了 (已搬遷) 新店位置

今時今日嘅西營盤已經唔同哂，特色小店林立，嘢食選擇越來越多，有好多地道小食店都選址西營盤，識食嘅都黎搵食。阿元來了西營盤，開咗間以台灣街頭小食為題嘅食店。店內空間雖然唔多，但陳設咗好多有台灣特色嘅擺設裝飾，可見店主花左唔少心機令顧客感受台風。此外，開放式廚房造到似足街頭小食攤檔咁，風味十足。肉燥飯 - 似樣，個飯嘅size比台灣嘅大，入口有黏糯，肥肉粒偏大粒，入口溶化，可惜味道偏淡，應該要再油潤啲，再膠啲，再濃味啲。蚵仔煎 - 蚵仔肥美但量很少。味道偏淡，除咗食到個甜辣醬嘅味，就冇咩其他味道。鹽酥雞 - 鹽酥皮唔夠厚，醃料唔夠, 又冇脆粒响面，唔夠味，啲雞唔入味。四神湯 - 飲落好香當歸味，大腸都好稔，好乾淨，味道都ok算足料。其他嘢食就偏淡，呢個就過鹹。香菇肉羮米粉 - 好好菇味，個汁有啲'漿糊'，不過啲人話地道係咁嘅喎。味道一般，偏淡。鹵味 - 有台式鹵料味，冇台式鹵味濃。老實講有啲失望，可能因為之前經過好想食，但係閂咗，望落又好似好地道，諗住會好有風味，結果有多少落差。風味係有嘅，做法係正宗，賣相亦地道, 但係味始終冇台灣嘅重口味，而且總體味道仍有改善空間。