澳門九記清湯腩王 (已結業)

有人問我，見你成日去澳門九記清湯腩王食嘢，啲清湯腩好得？我答我入去十次，有九次都係食海南鷄飯，以前只食清湯腩，但見到枱面寫住啲字幾得意(見相片)，所以有一次就點了泰式海南鷄飯($44)，點之一試後就一直點海南鷄飯到依家。泰式海南鷄飯跟蘿蔔湯，海南鷄上面已有薑蓉，另外會跟一碟綠色的薑蓉，先食一件鷄，鷄皮不會過肥，鷄肉算滑，雖然不能說去到鷄有鷄味，但以這價錢已經有80分，油飯飯粒分明又夠乾身，加上酸酸甜甜的薑蓉，不錯，眼見店內有七成客人都點泰式海南鷄飯就可看出其美味程度，真係做鷄好過做牛腩。蘿蔔湯，應該用鷄湯煲成，連蘿蔔都入哂味，幾好飲。

之前幾年已食過幾次澳門丸記清湯腩王，啲腩又鞋又柴皮，唔明咁嘅質素都可以叫清湯腩王？但有朋友同我講佢哋嘅海南鷄飯幾好食，咁又俾多次機會啦，見到店內好多食客都食緊海南雞飯，咁我又叫啦，原來有跟碗蘿蔔湯，碗湯夠熱但蘿蔔不夠熱，好明顯是另外放入湯中的，湯鹹鹹地，蘿蔔算夠甜無渣；海南鷄飯，先食一啖油飯，油飯算粒粒分明，夠香又不太濃味，雞肉嫩滑，鷄皮夠厚又沒有太多肥膏，點埋個泰式辣汁，真的是不錯，另雖然我喜歡食薑蓉配白飯，但配油飯又好似多咗少少，因為已經好夠味。原來跟餐叫凍飲只加$3，而飲品當然繼續點較早前從網上得知「甜飲全球每年殺18萬人，凍檸茶是兇手之一」成日害人不淺嘅兇手凍「檸茶」，我當然唔怕死，今次呢杯飲料夠，合格！清湯腩王，不如改名做海南鷄王？