豪華咖啡茶廳

营业中

休息中

朋友介紹黎左呢間70年歷史既茶餐廳，我地去既係新鋪，但裝修係有點古舊feel出餐速度超快，叫完等左唔夠兩三分鐘就有野食！自選常餐湯麵：沙嗲牛+炒蛋 米粉沙嗲汁份量都多，味道正常，炒蛋唔會炒得太熟，仲有少少蛋汁，不過如果分開上就更好。西多士：已經幫我地切件，好細心！滿滿既牛油同練奶😍入口即溶！仲要唔貴，只係$24！推介👍🏽下次想試埋沙嗲牛治！

距離上次嚟已經有一段好長時間, 諗番起上次嚟嘅時候隔離仲係綠屋, 綠屋樓下仍然係"有仔記", 今次再嚟綠屋已經活化咗做動漫基地lu。以前嚟一排排坐出街嘆下午茶嘅街景已經唔再見到, 取而代之嘅係茶廳喺隔離動漫基地下面開多咗一間分店, 以前坐出街嘅客人都坐哂入分店裡面,但係我個人比較懷舊, 所以我都係揀咗坐番入老舗。入到去坐低即刻落單嗌咗杯熱奶茶同整咗件芝腿多, 唔使等好耐就即刻嚟咗杯熱奶茶, 而我亦都急不及待咁即刻整咗一啖。奶茶溫度啱啱好唔會過熱, 茶香濃郁但唔苦澀, 入口感覺順滑, 仍然保持到當日水準。之後冇幾耐再嚟埋份芝腿多, 我亦都急不及待起動。芝腿多嘅多士烘得啱啱好, 面層脆得嚟但唔會好燶,中間芝士半溶, 口感同水準都保持得好好。食完件芝腿多覺得唔係好夠喉, 於是再落單整多件西多士。西多士都係一樣唔使等好耐就整好送到, 我亦都照舊即刻切開件西多開始品嚐。件西多士炸得啱啱好, 唔會太燶面頭呈金黃色, 口感外脆內軟, 每一啖都充滿住濃郁蛋香。今次嚟過之後唔知要過幾耐先會再嚟lu, 希望下次再嚟都可以繼續品嚐到今日嘅水準啦:-)