天奴豬扒餐廳 (已結業)

復活節，一起身跑完個步，緊係要搵食啦。老婆話想食豬扒飯，第一時間就諗到食『天奴豬扒飯』。餐廳唔算大，連埋『露天雅座』坐到三十幾人左右，但佢真係所謂客似雲來，而咁多人幫襯，係有佢既原因既。咁原因好簡單，就緊係好食啦。我地今次叫左個黑椒汁豬扒蛋飯，凍奶茶。大概5分鐘，野食就到左。驟眼睇你會以為佢平平無奇，但佢塊豬扒真係得，煎得幾香口之餘，佢仲好『臨』。然後，篤穿隻太陽蛋撈埋啲黑椒汁食一啖飯，真係一流。然後唔少得既係佢伴碟既茄子，由於本人相當喜歡食茄子，所以真係加晒分！