果子｜海南雞飯·喇沙摻摻 (啟昌樓) (已結業)

比佢個火山包吸引咗，又見網上多好評，所以專程入大埔試吓佢。晚市散叫左兩樣野：1️⃣軟殼蟹火山包未食過咁難食嘅火山包！所以冇下次！- 雖然等左20分鐘先上枱，但係成碟由面到心都係室溫狀態，連另上嘅一兜咖哩汁都係室溫嘅。- 農夫包乾左水，面唔脆，包太冧，係放左好耐嘅口感。- 軟殼蟹係算大隻，但係成隻冧哂。- 海鮮(蜆，青口，蝦）全部都係梅嘅。- 咖哩汁偏淡同甜，就算係熱果陣應該都唔會特別好食。鋪頭只係坐左1/3枱，唔多人，整到咁樣真係唔知出左咩事...2️⃣豬頸肉喇沙摻摻- 湯底重椰香，偏淡味同偏甜。- 油麵份量太少，米粉佔左八成。- 豬頸肉幾厚肉，口感味道正常，唔特別好食。唔知網上啲好評係點嚟，唔會推薦，唔會再去😵‍💫

大埔出名多隱世美食，但食【果子】我都係第一次。食完忍唔住畀返個好評首先係服務質素，啲侍應嘅態度好，上菜都好快，唔洗催，而且上到嚟啲嘢食係熱辣辣。可能係開冇耐嘅餐廳，整體都非常乾淨，坐位亦唔會好逼。講下食物，食物嘅質素都冇得彈，份量充足，夠足料平時食泰國嘢食得少少，肉又得一啲...真係唔會飽。呢間叫豬頸肉嘅話真係畀好多舊，食得好滿足味道方面，湯底非常濃郁（「摻摻」原來係拉麵mix米粉，好得意）雖然係食泰國菜嘅餐廳，但都有唔同嘅特飲，我叫咗珍珠奶茶，不過不失，都ok。

早兩日經過見到呢間新開既餐廳, 一眼望落去以為係日式既文青小店, 原來係食東南亞菜, 好似幾吸引, 周末帶埋屋企人一齊試下。中午去到都有幾個人排緊隊, 不過都好快入去。呢間餐廳有午市套餐, 主打喇沙同椰漿飯, 咁緊係飯同麵都叫哂黎try try。因為屋企人唔太食海鮮, 所以叫左個豬頸肉喇沙, 食落唔錯, 有椰香同咖哩香, 仲要唔太辣, 岩哂我呢啲怕辣但又鍾意食辣既人士。佢地仲有好正宗既做法, 將米粉同福建麵一齊煮, 食落有唔同口感, 大推! 另外叫左個印尼炒飯, 炒飯都ok同乾身, 最正係佢有配埋串燒, 蝦同蝦片,全部都不錯, 諗住下次黎試埋個南乳雞翼椰漿飯。因為太餓仲有叫左啲小食, 力推絲網春卷, 新鮮炸起仲熱辣辣, 入面好似有芋蓉同肉粒, 口感一流! 飲品加15蚊可以叫埋台式特飲, 宜家好興既黑糖珍珠鮮奶都有, 大大杯抵過喺出面飲。