武館 (已結業)

武館聽就聽左好耐，今日終於搵到人陪我食！餐廳標磅唔會翻枱同埋有二十幾道菜，得一個餐千五蚊一位，價錢同出面平均差不多，但菜式比一般廚師發辦多。今餐飯既感覺真係好似食緊法國菜咁，食極都食唔完，但好好味所以食極都仲食得落！事頭婆推薦當造既北海道香箱蟹，話今年特別靚好多膏，所以另外訂左一隻。膏真係好多好甜好軟，滿口蟹膏同蟹子真係好幸福😋😋😋另一個值得推薦就係富貴杯，有筋子，蔥拖羅，馬冀海膽同海葡萄，一向都唔食三文魚子既我知道筋子係新鮮版三文魚子先食，可能因為用酒調理過，果然冇出面食個種腥味，讚！高級魚喜知次亦係另一高潮位，之前只係係北海道食過一夜乾原條燒，已一試難忘，今次食火炙壽司，加埋個魚肝，估唔到呢個調理手法可以將條魚提升到超美味既層次！

非常好食樣樣都好新鮮，師傅話每日都有鮮魚到鋪，所以每日只做一輪，比客人慢慢品嚐美食及與其他客人交流。原來真係可以唔使去日本都可以食到果邊既質素絕對好過築地排隊果啲壽司鋪！今次除左好彩仲食到秋刀魚尾啖湯，特別一提另外預訂北海道活香箱蟹，黎到仲識郁，蒸熟左有流心膏，正過大閘蟹多多聲不過食埋呢兩個月就冇！