The Butchers Club (K11購物藝術館) (已結業)

女友網上見到最近呢間逢星期一有classic burger買一送一優惠，所以黎試下。Classic Burger 有三款，一個牛肉兩個素。呢個係經典的classic burger，食落去個漢堡非常juicy，係咁滴汁，加上大大片青瓜同芝士，鐘意最classic既朋友可以試試。女友點了素burger，牌子係beyond meat，食落去同真既好似，不過就無咁juicy，另外點了黑松露薯條，黑松露味好香，同薯條好夾。如果無優惠一個burger都成一百蚊，我自己就唔捨得食，burger係用心整既，值唔值就見人見致。

Happy Friday 想豪一豪氣就同同事黎到K-11食Burger🍔餐廳環境似酒吧，幾有西方風情，食客有唔少都係外國人，令到成個氣氛更加似去左西方國家🙈黎到先知原來哩間係米芝蓮餐廳，即刻對佢嘅burger充滿期待。食物價錢偏貴，百幾蚊都只係單點burger嘅價錢，哩個價係其他地方已經食到成個burger set，有埋薯條飲品，所以今次就淨係嗌住單點先...🙈 THE CLASSIC BURGER🍔Burger size比想像中細，係無加set嘅情況下可能會唔夠飽。Burger中間夾住漢堡排、煙肉、蕃茄同酸瓜。哩個高度可以一啖咬到所有層次，唔會好狼狽，煙肉煎到微焦食落脆脆地幾有口感，漢堡排都算幾厚，只係口感好梅，一咬啲肉就鬆散晒咁，又無咩味道，唔會令人想食第二次...雖然唔知到底米芝蓮係用咩標準衡量，不過以一個普通食客黎講，哩個價錢，哩個份量同味道，真係一次就夠

同幾個朋友黎食個late lunch!我地幾個悠悠閒閒，行到肚餓就黎到依度食野。依度唔算好大，多數枱都係坐高枱架！我地每人叫左一個burger，相另外叫多兩份薯條，有thick chips 同 thin chips，兩樣都試下先！依度係要去收銀度落左order先，再會有張收據，有號碼嘅，之前侍應就會叫號碼，送食物到你張枱度架喇。食物全部都係即叫即整，所以要等大約10分鐘啦，等餐時間唔算耐。個burger一黎到，睇落唔係好驚喜，但一食就知喇！burger入面嘅牛肉係定左medium嘅，一咬落去，就知係有用心架喇！麵包嘅邊位烘到脆脆地，肉亦煮得啱啱好，加上蕃茄同酸瓜，仲有一片好香嘅芝士，好味！再咬深d就食到煙肉，好香呀。幼薯條亦係另一推介，有辣粉，加上撒係飯面嘅日式紫菜碎，仲有醬，加埋晒一齊食，停唔到口呀！粗薯條都整得唔錯，好香呀！不過就有少少乾，下次試下點茄汁先！仲有朋友嘅雞翼，係辣辣地架，仲有醬配住黎食，醬入面有少少blue cheese，睇落都唔錯！不過我無試到，唔知道會唔會好辣喇