木船 (已結業)

約左朋友係大埔食晚飯，試左木船呢間餐飯！真心推薦，除咗食物好味、裝修特別之外，服務態度都好好。如果係大埔嘅話可以試下！我哋想叫啲小食，有好多選擇，所以決定叫一份Combo小食拼盆（$52），有4款唔同嘅小食，每款有2件，姐係總共8件！一次過食到4款唔同嘅小食，正呀！同埋全部都係熱辣辣嘅，特別個炸蝦球，勁彈牙！仲有呢個招牌菠蘿炒飯配虎蝦（$158）都好推介！推介！賣相一流，原隻菠蘿，而且啲菠蘿串到好高，仲有兩隻虎蝦係上面！即刻打卡打卡！成個菠蘿入滿晒炒飯，啲炒飯加左肉鬆、蛋、雞肉，同埋其他配料，所以食落口感好豐富。鐘意食蒜蓉嘅話，一定要試呢個蒜蓉虎蝦煲（$118）。超多蒜蓉，配埋粉絲一齊食，好香口。另外，虎蝦大大隻，本身啲蝦殼已經劏開咗，所以輕鬆食晒啲蝦肉。因為係配蒜蓉，所以啲蝦好入味呀！蒜蓉虎蝦煲免費配一杯熱柚子蜜然後我地再叫多杯新鮮柚子沙冰。兩杯都係柚子！沙冰嘅頂有好多西柚果肉，酸酸地，好開胃，而好有口感！呢餐真係食得好滿足呀！

呢間木船係太和都開左好幾年，成日經過都好多人食，今晚8點同女友經過，見咁岩有一張枱就入去食。入面環境都好舒服，好多木同麻繩既裝修。而我地坐既位個設計就好似真係一隻木船入面咁，幾靚架！不過冇影到，你去過就會明咁我地兩個人就叫左3個食物，加2杯野飲。餐牌第一頁好有趣的，係泰文既教學！餐牌入面基本上每個食物都有圖，好易揀！先黎既係泰式鳳爪沙律，都幾大碗，仲要有足足半碗都係鳳爪，過足口癮，開胃之後上既combo 小食拼盆，有4款小食，每樣兩件，兩個人食岩岩好。個炸蝦球好香好好食！之後既重點來了！招牌菠蘿炒飯配虎蝦！ 上枱既時候我眼都突埋！第一次食菠蘿炒飯有呢種視覺上既震撼，整得好有心機！食落炒飯都好香，好足料，有雞肉粒、蛋、提子乾、肉鬆、菠蘿粒；而兩隻虎蝦都應該幾鮮，d 殻好易剝開，非常正呀！我地仲叫左兩杯飲品，呢杯「脆爆芒果園」好巨型呀！係芒果乳酪沙冰，上面有d 爆谷，入面仲有粒芒果麻糬，超級豐富 咁呢杯飲到尾就幾甜既，有食左甜品既感覺！而另外呢杯「夏日芭東海灘（菠椰）」都好靚啊！味道好清新！ 雖然唔係好肯定入面係咩成份，有椰汁同少少菠蘿既味，奶昔既口感，都好解渴，好特別！呢杯我覺得係必試的