西营盘系一个令人放慢脚步嘅地方，沿路亦会发现好多小店富亲切感。行至水街楼梯转角，更会见到纯白墙画满小动物，原来系墨西哥人主理嘅“Verde MAR”。墙上插画都系墨西哥常见嘅可爱动物嚟㗎，店内就主打地道健康墨西哥菜喇。
墨西哥人主理嘅“Verde MAR”，纯白墙身画满当地可爱动物。
墨西哥大厨崇尚健康自然，坚持所有酱汁料理，甚至乾酪、冰淇淋均自家制，零味精。
俨如牛油果专门店！地道墨西哥菜原来可以好健康
同香港人印象中嘅墨西哥菜好唔同，原来正宗嘅墨西哥菜唔系重酱浓味，甚至健康到差唔多每道料理都有牛油果踪影。因为墨西哥受地理、天气因素眷顾下盛产牛油果，当地人食牛油果真系由细食到大。所以喺度会食到好多牛油果菜式，而所用的牛油果全由大厨仲只亲手拣，有如奶油般软滑的口感，所以话“Verde MAR”系牛油果专门店都不为过呀。
店内白色、木系同植物为主，气氛悠閒。
【崇尚自然】连乾酪都系自家制！保证零味精
大厨ELIGIO 爸爸喺墨西哥开餐厅，令佢自细学识尊重食物、崇尚自然，所以佢好坚持由零开始煮制食物，酱汁、食材；就算连乾酪都自家制，确保食客唔会误食致敏食材，亦不含味精、添加剂。
除咗全程自家煮制，店内甚至自设种植园，即摘即煮新鲜仙人掌。
【牛油果Fans召集】
自家制牛油果冰淇淋
嚟到一定要试最高人气嘅牛油果冰淇淋！成个冰淇淋都系用牛油果肉、牛奶自家制㗎。味道好似食紧牛油果咁，但就更加冰凉绵滑，啱晒夏天。
最估唔到系连粒「牛油果核」都食得。其实真身系用新鲜芒果制成，清甜味道好啱配牛油果。
用新鲜芒果制成嘅「牛油果核」，清甜味道好啱配牛油果。
牛油果花配脆栗米饼
呢个牛油果花花就好受女仔欢迎，上层系牛油果铺成嘅玫瑰花；下层就有脆卜卜墨西哥粟米薄片，又软又脆撞出双重口感。
女生一定钟意嘅牛油果花花。
【自家种植】仙人掌苹果汁
仙人掌唔系度度食到，喺香港餐厅入面即摘即食应只有Verde MAR做到。而其实墨西哥人成日都会饮仙人掌汁，甚至有仙人掌料理㗎。仙人掌肉光泽透明，味道清爽淡雅，加埋轻甜苹果搾汁啱啱好。
同场可以饮埋牛油果奶昔，都系用新鲜牛油果、牛奶制作，绵滑有乳香。
香港极罕见，即摘即榨仙人掌汁。
【限定料理】超嫩！入口即溶慢煮牛面肉
墨西哥菜有好多肉汤类，但就好少用牛面肉嚟煮。大厨一次机缘巧合下试用牛面肉熬汤，因为肥膏筋位少，所以汤头惊喜地清澈，但又有丰富骨胶原，绝对适合崇尚健康的女士享用。
汤头清澈肉味浓，所以唔使好多香料已经好好饮。反而食嗰阵可以用薄饼包住牛面肉，再蘸少少红莎莎酱，一嚐番茄、辣椒嘅甜甜辣辣好惹味。
软腍牛面肉入口即溶，又有丰富骨胶原。
乾酪薄饼
墨西哥经典薄饼—乾酪薄饼，轻轻烤过的薄皮包住Mozarella乾酪、新鲜蔬菜同自选肉。蘸酱食微辣带香，好有地道风味。
牛油果罗文生菜生律
呢度真系牛油果控天堂，好多牛油果料理都落足料，好似呢个沙律就用咗原个牛油果！真系每啖都食到肥美果肉㗎。
最值得一提嘅系乾酪，因为大厨ELIGIO对食物嘅坚持，系连牧场乾酪都系自家制。乾酪新鲜制作又不含防腐剂，食落香浓纯净带咸香，完全无羶味。
沙律用上原个牛油果，每啖都有肥美果肉。
牛油果青柠开胃沙律
其实墨西哥都有海鱼刺身，喺呢款牛油果沙律就食到喇。虽然叫刺身，但其实唔系生食。墨西哥地道食法系利用青柠汁，将海鲜醃至半熟，保留到鲜味又轻酸开胃。
沙律入面仲有牛油果、新鲜番茄同青瓜粒，系墨西哥沿岸好受欢迎嘅料理嚟㗎。如果唔食鱼，都可以转为全牛油果。
墨西哥地道煮法嘅海鱼刺身，利用青柠酸度醃熟鱼肉。
墨西哥海鲜饭
墨西哥曾受西班牙统治几百年，所以饮食文化都有西班牙影子，呢个海鲜饭就系其中之一喇。而墨西哥版本有别西班牙，系用海鲜汤将米饭煮得Q弹，粒粒分明唔会黏口。
上面铺满大虾、青口、带子等海鲜，食之前加啲青柠汁更加惹味㗎。
秘制海鲜汤煮米饭，粒粒Q弹并充满海鲜精华。
肉桂脆条配朱古力酱
提到西班牙料理，相信大家对Churro完全唔陌生。全靠大厨本身崇尚健康，所以由面团开始已经自家手制。用天然面粉搓制，即叫即炸外脆内软。
虽然系炸嘢，但起码所有食材、调味都系健康零添加，蘸多啲朱古力酱食都无罪恶感呀。
Churro由面团开始自家制，即叫即炸好酥软。
Margarita
“Verde MAR”成个环境都好有外国气氛，想轻酌两杯暂时远离繁嚣，经典鸡尾酒“Margarita”有3款口味拣—青柠、香橙同辣。
外国小店氛围下，轻酌两杯暂时远离繁嚣。
Verde MAR
地址: 西环西营盘水街41号地舖
电话: 28100888